Mukaon gyud sa buntag

Dinhi sa siyudad, atong namatikdan ilabi na kadtong nanarbaho o kaha nag-eskuyla, nga sagad dili na manumbaling sa pagkaon sa pamahaw. Nawad-an na og gana kay nag-apas ang ilang huna-huna sa tagsa-tagsa nila’ng padulngan. Wala lang hatagi’g pagtagad, kun unsa g’yud kabililhon ang pagkaon sa buntag. Angay palandungon nga atong tiyan, sud sa taas nga oras sa atong pagkatulog, nabasiyo na ug nahilis nga wa nay pagkaon. Aduna kini mga dili maayo’ng epekto. Ang uban nagtuo nga ang dili pagkaon sa buntag, makapadaot ilabina niadtong gusto nga magpabilin ang ilang kasarangan nga gidak-on, aron pagpabigot o pagpaseksi sa ilang lawas. Apan naunsa ba nga misamot man hinoon katambok.

Unsaon nga permi na man hinuon nga gutomon, mamawi man nga ganado na nga mokaon nga usahay mamusdik kay nasubrahan. Mora na hinuon og hangol, ilabi na nga lapas na sa udto mokaon.

Dili kini maayo nga paltahan ang pagkaon, motultol ka g’yud sa oras. Mokaon ka’g regular, katulo sa usa ka adlaw: pamahaw, paniudto ug panihapon. Way usa niini nga imo lang labyan ilabina g’yud sa oras sa pamahaw.

Mahimo’ng dili ka mag-meryenda,kay sagad wala man say mga nutreyens ang snaks nimo. Mas maayo gani, sa pamahaw pulos sustansyado ang imong kaunon. Dili kay igo lang mohigop og kape, kun wa kay gikaon, makapakurog o makapanerbiyos kini sa lawas, mosamot nga magluya ka nga gigutom.

Wala’y kuryente ang lawas mo, wala’y gahum o kusog aron isustenir sa lawas ug utok nga imong gipatrabaho. Mag-agunto nga magdagook ang sud sa imong tiyan nga nagsigi’g bag-id ang mekanismo sa paghilis, nga way kaon. Asido ang mokotkot sa tiyan hangtod mahilis ug mabuslot nga mahimong sakit nga ulser. Kun tingbon sad nimo ang pagkaon, manubra ang kapasidad sa kaloriya nga masud-ipan nga dili ka ‘sab kahilisan.

Tanang subra o kulang makadaut g’yud. Busa, seguroa nga mukaon g’yud ka sa buntag una ka mohimo sa tibuok adlaw nimong gimbuhaton. Kun buot kang magbaton og lihok o panghunahuna nga epektibo ka sa tanang gusto mo. Gamhanan ang panglawas mo nga molahutay sa pagsagubang sa unsa may buot mong buhaton basta sa buntag maoy andama ang pagkaon nga puno sa sustansya, nga kini maghatag ‘sab kanimo og kaabtik.