Ilegal ang bingo machines?

Misugod na sa pagreklamo ang mga ginikanan kabahin niini’ng gitawag og “bingo machine” nga mikatap na pag-ayo dinhi sa dakbayan.

Ang ubang ginikanan nga mireklamo midangop sa media. Gitug-an usab kini sa media ngadto sa kapolisan apan ang mga polis nangatarungan nga dunay permit ang bingo machine gikan sa City Hall.

Dili kuno sila makahimo pagsakmit sa mga bingo machine kay gihatagan man og permit sa City Hall. Miiknat ang ato’ng kilay niini kay kun ilegal man kini nga kalihukan ngano’ng may permit man?

Si DYLA reporter Chito Aragon mihulagway sa bingo machine nga susama ra og sistema sa video karera kay mohulog ka og P1 ngadto sa electronics machine, usahay makadaog ka, apan sagad g’yud pilde.

Mao kini nga ang mga ginikanan mireklamo kay ang ilang kabataan maoy mabiktima. Kun sugal man diay kini, angay nga ang kapolisan mohimo og suwat ngadto sa City Hall aron ipasabot nila kining mao nga isyu.

Dili kay kutob ra kamo sa pag-ingon nga ilegal kana nga sugal kay susama ra sa video karera apan wala kamoy mahimo tungod kay gihatagan man og permit sa City Hall.

Paghimo kamo og suwat ngadto sa mayor, sa mga konsehal sa dakbayan, ngadto sa media, aron ipasabot nga ilegal kini nga sugal ug dili angay nga hatagan og permit aron nga mahunong kini nga tinonto.

Kini maoy himoa Sir Noli Romana nga morekomendar ka ngadto sa City Hall nga iparebokar ang mga permit nga gihatag niining mga nag-operate sa bingo machines.

Apan subli nako nga ipahibalo nga wala gayud mapuo ang video karera. Daghan gihapon ko og madawat nga mga report nga may nag-operate nga video karera diha sa Suba ug sa Pasil.

Duha ka semana na ang milabay may mitaho usab nako nga adunay video karera didto sa usa ka sitio, nakalimot na lang ko, sakop sa Barangay Punta Princesa.

Sagdi lang, dad-on usab nako kining mao nga isyu ngadto sa atong mga opisyal sa dakbayan.