Pag-unong sa Santo Papa
May petsa na gyud sa pagduaw ni Pope Francis sa Pilipinas. Human sa abunda uyamot nga mga huhungihong--nga mohapit ang Santo Papa sa atong nasud karong Agosto human sa iyang pagtambong sa Asian Youth Day sa South Korea karong Agosto ug nga moanhi siya human sa pagduaw sa Sri Lanka sayo sunod tuig--may tino nang petsa nga niggawas gikan sa opisyal nga mga tinubdan sa Vatican.
Enero 15, 2015 ang gitakda nga pagduaw ni Pope Francis. Wa pay detalye nga giluwatan ang Catholic News Agency pila ka adlaw siyang magpabilin dinhi. Apan natino na ang katuyoan sa iyang pagduaw.
* * *
Hagbay ra nga nangandoy ang Santo Papa nga makaduaw sa mga biktima sa bagyong Yolanda sa Kabisay-an. Matud sa kadagkoan sa Vatican nga niduaw sa Tacloban City ug ubang dapit nga naggusbat sa katalagman, naningkamot sila nga masukip ang Pilipinas sa puno na kaayong kalendaryo sa iyang mga biyahe sa nagkalainlaing kanasuran sa kalibotan.
Sa wa pa matino ang petsa sa pagduaw, gipahibawo nang daan sa Catholic Bishops Conference of the Philippines (CBCP) ang mga destinasyon ni Pope Francis: Ang mga dapit nga nahapay sa bangis nga hangin ni Yolanda sa Leyte ug Amihanang Sugbo ug ang mga dapit nga nalup-og tungod sa makalilisang nga linog sa Bohol.
* **
Si Obispo John Du, ang Sugbuanong tagduma sa Artsidyosesis sa Palo, Leyte, nga niunong sa iyang mga parokyano pagsagubang sa bagyo ug nangu sa ilang mga paningkamot pagbarug pagbalik taliwa sa lapad nga pagkagusbat, nabalaka nga di pa sila andam nga modawat sa Santo Papa.
Apan si Cebu Archbishop Jose Palma ug ang CBCP nipahinumdom ni Du ug sa kaparian sa Silangang Kabisay-an nga ang pagduaw ni Pope Francis mahitabo sa tukmang panahon--kanus-a nagkinahanglan og magdadasig ang mga biktima ug magdadasig pagsugod pagbalik sa ilang kinabuhi ug pahinumdom ang gobiyerno sa Pilipinas ug ubang kanasuran nga wa pa hingpit nga makabangon ang mga biktima ug busa kinahanglang padayunon pa pag-agak.
* * *
Makaangkon na og bayhon ang pagsihag sa matinud-anong pag-ambit sa Santo Papa sa kapait sa kahimtang sa mga biktima sukad sa pagkahitabo sa katalagman hangtod karon. Ang gamhanang mensahe sa iyang paglatas sa kalibotan nga nag-uwang sa Vatican ug Kabisay-an makapalig-on sa lutahan sa mga biktima pagbarug sa ilang kaugalingong mga tiil.
Pakapin na lang nga kuyogan si Pope Francis sa kalibotanong media nga makahulagway ngadto sa ubang kanasuran sa kamakaluluoy pa sa mga dapit nga gilinog ug gibagyo. Basin na lang nga kusion ang tanlag sa mga nisaad og tabang nga wa pa makahatag ug sa mga nagduma sa rehabilitation nga di na tugotan nga mamantsahan pa og pangurakot ang nadawat na nga mga hinabang.
* * *
- Latest
