EDITORYAL - Ampo na lang kun masakpan

Daghan sa mga dakponon sa kapolisan ang ilang napusilan. Ang uban kanila napatay kay misukol ug dili gusto nga magpadakop nga buhi.

Angay lang nga gamiton sa kapolisan ang ilang service firearms aron panalipdan ang kaugalingon kay ang mga gukdunon sa balaod karong panahona armado na ug tag-as pa nga kalibre ang ilang armas.

Kini’ng mao nga mga gukdunon sa balaod dili magpanuko pagpatay sa kapolisan kun makahigayon mao nga sa abtik lang. Ang uban mogamit sa isyo nga “over kill” kay gitusak-tusak kuno sa bala ang lawas sa kriminal.

Kun ang usa ka kriminal may umoy pa sa pagkablit sa gatilyo sa ilang automatic firearms, sigurado nga daghan sa mga polis ang mangamatay mao nga maniguro g’yud ang mga polis.

Kadto’ng drug pusher sa Barangay Duljo-Fatima gipusil sa polis kay misukol. Labaw na kadto’ng grupo ni PO1 Owen Rosales nga gikapinusilay sa mga polis didto sa Bien-Unido, Bohol human nila patya ang hepe sa kapolisan sa lungsod sa Ubay.

Didto sa Lapu-Lapu kaniadto’ng Domingo, napusilan usab sa mga polis ang suspetsado nga gun runner nga misukol usab kay dili magpadakop. Husto si Cebu City Police Intelligence Chief Romeo Santander sa pagbahad nga dili sila magpanuko sa pagpatay sa mga kriminal nga mosukol.

Apan ang pag-surrender wala na kana sa bukabolaryo sa mga kriminal karong panahona kay ang ilang baruganan mao nga pinatyanay ang ilang gusto kun masakpan sa mga polis.

Ang baruganan sa kapolisan nga mas maayo pa nga maoy makapatay kay sa maoy mapatay ug isulod sa lungon.