Diha sa pagkaon ug pag-inom

Hilig kita nga mamista ug hilig kita og pagkaon. Mao kini ang usa sa mga tatak natong mga Pilipino.

Apan luyo sa maong pagkaon ug pag-inom nagpahipi ang mas lawom pa nga tinguha ug pangindahay. Ang tinguha nga makighiusa pinaagi sa pakigsalo sa pagkaon.

Ingon ini usab ang Misa ang atong Ginoo nakighiusa kanato pinaagi sa paghimo sa iyang kaugalingong Lawas ug Dugo nga kahimanan aron siya mahimong usa kanato ug kita mahimong usa kaniya. Timaan kini sa dakong gugma niya alang kanato, timaan kini sa iyang dakong pagtagad kanato.

Sa matag saulog nato sa Santos nga Misa kini unta maghatag kanato sa bunga sa pagkahimong Sakramento kun konkretong mga timaan sa kang Kristong Kinabuhi dinhi sa Kalibutan, pinaagi sa ato mismong kinaiya ug binuhatan.