Anti-age discrimination bill

Sa atong pagsuwat niini, nagsugod na ang Senado pag-debate sa gi-file nga Anti-Age Discrimination Bill – balaudnon nga kun maaprobahan mosilot sa dili modawat og job applicant tungod kay edaran na.

Sa pagkakaron gud, maghisgot ta’g panarbaho, wala nay esperansa ang mga taas na og edad, labi na kita’ng mga senior citizen. Sa mga advertisement, labi na sa mga dagkong kompaniya, ila g’yud nga ibutang ang edad nga kabahin sa mga qualification sa buot mo-apply.

Sagad, ilang ibutang, between 18 – 25 years. Sa ato pa, kun 40- years old ka na, o senior citizen na, ayaw na lang patuga-tuga’g apply, otherwise, abugon ka sa security guard.

Usahay ilang pakapinan ang qualification: “with pleasing personality.” Sa ato pa, kun tiguwang ka na, unya, ngil-ad pa og nawong, puyo ug padaplin na lang, kay bisan qualified ka sa trabaho, di g’yud ka dawaton.

Giingon sa balaudnon nga “It would be illegal to print or publish any notice of advertisement relating to employment suggesting preferences, limitations, specifications and discrimination of age.”

Sa ato pa, ang pag-advertise sa panarbaho nga mag-apil sa edad nga kabahin sa qualification usa na ka ilegal ug supak sa balaud kun kining maong balaudnon maaprobahan.

Idili usab unya nga ang edad sa tawo maoy basehan kun pila ang  i-suweldo kaniya ug uban pa nga terms and conditions ug privileges nga madawat sa empleyado.

Dili usab basehan ang edad sa promotions ug dili mapugos ang kawani pagpa-retire gumikan lang sa edad, gawas tingali kun moabot na sa retirement age.

Si Senador Pia Cayetano nga usa sa nag-sponsor ni’ng maong balaudnon miingon nga “while we respect the prerogative of an employer to choose the best person fit for his/her company, their discretion is not absolute. It must be tempered with the principle of fairness and equal opportunity for all. Ability, rather than age, should be the test.” 

Gipasabot ni Cayetano nga samtang katungod sa mga employer pagpili kinsa’y mo-qualify sa matang sa trabaho nga ilang gikinahanglan, unta ilang hatagan og managsama’ng kahigayonan ang mga jobseekers, regardless sa edad. Ang kahibawo, ang abilidad, mao untay basehan pagdawat o pag-deny sa usa ka job applicant, dili mainly ang edad.

Maayo na kini, kun mahimo g’yud kini’ng balaud kay mosuway ta’g apply ni Governor Junjun Davide o ni Mayor Mike Rama.

Mahitungod ning pangimpleyo sa senior citizens, ang RA 9994 kon Expanded Senior Citizens Act of 2010, nagkanayon “Senior Citizens who have the capacity and desire to work, or be re-employed, shall be provided information and matching services to enable them to be productive members of society. Private entities that will employ senior citizens as employees, shall be entitled to an additional deduction from their gross income.”

Sa Manila, dunay coalition sa nagkalainlaing pundok nga concerned sa panarbaho, ginganlan og “Abilidad, Hindi Edad” Movement.

Text sa Senior Citizens Hour  sa DYRC, matag Sabado, 5:00-6:00 pm, 09334667902.