Dili pa kumbinsido sa mensahe

Ang kagamay sa mga tawo nga nanambong sa anti-pork barrel rally niadtong Independence Day didto sa Plaza Independencia nagtimailhan nga dili pa g’yud ingon katibuok ang kayugot sa mga tawo sa Sugbo batok nianang Priority Development Assistance Fund ug Disbursement Acceleration Program (DAP) sa administrasyong Aquino.

Ang giduso nga maoy mahimo’ng figure head sa anti-pork barrel coalition sa Sugbo nga si Arsobispo Jose Palma wala gani mutambong sa maong rally.

Sa mga diskusyon sa Maghisgot Kita’g Politika Bay nga usa ka group discussion account sa Facebook, nanglutaw ang mga pagtuo o pagduda ngano’ng ingon niini kagamay sa mga Sugboanon nga miapil sa kawsa batok ning isyuha.

Usa sa mga gituohang hinungdan mao ang kakulang pa sa pag-edukar sa katawhan sa Sugbo kalabot niining PDAF ug DAP. Posible kini.

Apan lahi ang akong tan-aw niining puntoha.

Tinuod nga nagyagaw ang mga organizer kabahin sa mensahe nga ipasupot atol sa maong rally.

Intelihente ang mga Sugboanon. Bisan ang mga dagkong politiko didto sa kauluhan miila man sa mga Sugboanon nga mga “intelligent voters.”

Nasayod ang mga Sugboanon nga wala nay PDAF kay gideklarar na kini sa Korte Suprema nga “unconstitutional” samtang sila mismo nga mga senador ug kongresista wala na mangahas sa pagsukip sa PDAF diha sa General Appropriations Act of 2014.

Sa ato pa, wala nay legislative pork barrel nga maoy gikalagotan dili lang sa mga Sugboanon kon dili sa mga Pilipino tungod sa pagwari-wari sa mga magbabalaod sa kuwarta sa pork barrel pinaagi sa pagliko niini paingon sa mga NGO’s ni Janet Lim-Napoles.

Sa akong nasabtan, ang tumong sa anti-pork coalition mao nga pinaagi sa Peoples’ Initiative mosulat ug mopasar og balaodnon nga magwagtang sa PDAF ug DAP.

Usa sa mga miapil sa diskusyon sa Maghisgot Kita’g Politika Bay mao ang akong higalang si Jesse Bacon nga usa ka kleriko sa United Church of Christ in the Philippines sa kauluhan ug kolumnista sa usa ka tabloid. Iyang gi-esplikar nga wala nay pork barrel karon tungod lagi kay ang PDAF gideklarar na nga unconstitutional kay lump sum appropriation ug wala na usab isukip sa 2014 national budget.

Samtang wala pa modesisyon ang Korte Suprema sa DAP, ang Malacañang wala pa mohilabot sa pundo nga alang nianang executive pork barrel.

Sa ato pa, ang dautan nga gusto’ng pugngan sa balaod nga buot ipasar sa Peoples’ Initiative nga ilusad karong Agosto 23 dinhi sa Sugbo pinaagi sa National People’s Congress wala na diay!

Akong gipasupot akong punto nga “unsa may imong patyon kun ang imong patyonon patay na?”

Unsa may PDAF ug DAP nga ibasura pinaagi sa balaod kun wala na kining duha ka klase nga pork barrel?

Nakasabot ang mga Sugboanon niini. Mao tingale nga sa pagkasayod nila sa tumong niining maong rally nga mao ang pagbasura sa pork barrel system, miabot sa ilang alimpatakan nga kun motambong sila basin og usik ra kini sa ilang panahon.

Usa pa gyud. Akong nahibudngan nga ang Simbahan isog man unta kaayo’ng mibarog batok niini’ng pork barrel, apan ngano’ng wala man sugo-a ni Arsobispo Palma ang iyang mga kura paroko sa pagpadala og mga parokyano sa rally?

Akong hunahuna niini simple ra. Adunay umaabot nga International Eucharistic Congress sa 2016 dinhi sa Sugbo ug si Arsobispo Palma maoy adunay dako og “role” niining maong kalihukan. Nagkinahanglan ang Simbahang Katoliko og tabang gikan sa gobiyerno alang sa IEC busa dili angay nga ang arsobispo maoy mangunay sa pagbarog sa entablado batok sa isyu nga nakapaalkanse sa kagamhanan.

Akong awhag sa mga organizers mao ang pagbalik-lantaw sa “objectives” ug ayoha sa pag-define unsay mensahe sa rally. Unya dili apilan og laing isyu ug dili apilan og personal nga kayugot batok sa mga politiko nga nalambigit niining pork barrel scam aron mahimo’ng epektibo.