EDITORYAL - Age limit babag sa kalamboan

Kung atong obserbahan og maayo, sagad sa mga dunay trabaho kondili man tanan,  apan dakong porsiyento niini nag-edad gikan 18 hangtud sa 30-anyos. Apan duna say mga kaso sa child labor nga padayong wala pa mawagtang ilabi na sa mga hilit nga dapit.

Kadaghanan usab sa 30-anyos pataas ang walay mga trabaho. Kinabag-an kanila way trabaho dili tungod kay wala silay skills o nakamaohan, nahimo silang estambay ug pakan-unon na lang sa ilang pamilya kay wa nay modawat nila tungod sa edad.

Dunay daghang giduso nga balaudnon diha sa Kongreso nga nagtinguhang wagtangon ang “age limit” sa pag-hire og mga aplikante kay maisip kini nga usa ka matang sa deskriminasyon.

Dili tanang trabaho kinahanglan nga batan-on gyud ang kuhaon. Mag-unsa man gud nang batan-on kun way eksperiyensya.

Si Sen. Pia Cayetano adunay giduso nga Anti-Age Discrimination in Employment Act of 2013 nga nagpaabot pa sa ikaduhang pagbasa sa Senado. Adunay susamang balaudnon sila si Sen. Miriam Defensor Santiago ug Sen. Jinggoy Estrada.

Gikinahanglang mawala kining age discrimination tungod kay mao kini ang nagpaburot karon sa unemployment sa nasud.

Kung patrabahoon lang unta kining mga dunay kamaohan bisan pila pa ang ilang edad, dako kini og impact sa estado sa matag  banay. Tungod sa maong diskriminasyon, kadaghanan sa mga eksperiyensyadong mga mamumuo ang namiya na sa nasud ug aron mangempleyo sa abroad.

Samtang daghan kanila nga gikan na sa ubang nasud ug may daghang kamaohan ang dili gihapon makatrabaho dinhi tungod gihapon sa age limit. Pagkaanugon sa ilang mamahimo pang kontribusyon sa ekonomiya.

Kun wa lay “age limit,” mas progresibo pa siguro karon ang Pilipinas ug wala untay mga kaso sa “child labor.”