Unsa ba kita ka gawasnon?

Sa makausa pa, nagsaulog na usab kita sa adlaw sa atong kagawasan. Kagahapon, mapagarbohon natong giwagayway ang atong mga bandila isip pagselebrar sa ika-116th nga Independence Day. Apan subra na sa usa ka gatos ka tuig human kita nakabaton og kagawasan gikan sa renda sa kolonisasyon sa Espanya, unsa ba gayud ka gawasnon kitang mga Pilipino niining mga panahona? 

Samtang nagsaulog kita sa adlaw sa atong kagawasan, adunay seryosong territorial dispute nga naghulga sa atong sovereignty isip usa ka gawasnong nasud. Kini tungod kay gihinay-hinay og iskwat sa higante’ng China ang ubang natong isla diha sa West Philippine Sea.

Nagkadako na kining maong gubot. Ug atong nakita nga klarong wala gayud kitay dag-anan. Apan manghinaut na lamang kita nga dili kini moabot sa punto nga mobuto gayud ang gubat.

Klaro usab nga panglawgaw sa atong pagkagawasnon isip usa ka nasud ang pasingit sa China. Ang atong sovereignty maoy gipanamastamasan niini nunot lagi sa kahuyang sa atong armadong kusog.

Sa laing bahin, samtang nagsaulog ang nasud sa adlaw sa atong kagawasan, padayon usab nga naglunang ang uban kanato sa kapobrehon. Padayon silang gigapos sa kadena sa kawad-on.   

Wala na  siguro kitay kagawasan gikan sa kapobrehon. Bisan pa sa panghambog sa gobiyerno mahitungod sa grabe’ng pagsulbong sa atong ekonomiya, padayong nalugmok ang kadaghan kanato sa dagkong utang.

Mao nang, tungod sa kalisod,  daghan kanato ang adto na lamang manimpalad sa gawas sa nasud. Kini gumikan lagi kay wala gyuy oportunidad dinhi. Kun aduna man gani, dili usab paigo alang sa pamilya.

Asa na man ang atong kagawasan niini? Nganong padayon kitang ulipon sa kawad-on? Siguro kulang pa ang atong paningkamot. Siguro kulang pa ang paningkamot sa kagamhanan pagpangita og paagi pagpalambo pa sa ekonomiya.

Niining atong pagsaulog sa adlaw sa atong independensiya, usa ka dakong pangutana karon kun unsa ba gayud kita ka gawasnon. Dako kini nga hagit alang kanato. Apan makab-ot lamang nato ang tinuod nga kagawasan kun aduna lamang kitay kalamboan isip usa ka nasud.