Mahimo pa ba gamiton ang SPA bisan kun patay na ang nagpirma?

Dear Atty. Divine,

Ang akong papa namatay niadto’ng miaging tuig. Apan sa wala pa siya namatay aduna siyay gihimo nga Special Power of Attorney kon SPA nga naghatag kanako og katungod sa pagbaligya sa among property didto sa Bohol apan wala mahalin ang maong property sa dihang buhi pa siya. Karon, aduna nay interesado nga buyer. Ang akong pangutana kun mamahimo pa ba nako nga gamiton ang maong SPA bisan kun patay na ang akong papa? Unsa may maayo’ng buhaton namo kay ang maong property nakarehistro man sa pangalan sa among papa? - Rina”

* * *

Dear Rina,

Ang  SPA nga gi-execute sa imong papa dili na mamahimo nga gamiton karon nga patay na siya. Base sa balaod, usa sa mga paagi nga mamahimo’ng way bili ang SPA kun namatay na ang nag-execute niini (Art. 1919, New Civil Code). Buot ipasabot nga kun imong ibaligya ang maong property pinasikad sa SPA sa imong amahan hayan mamahimo nga kwestyonable ug dili balido ang maong pagbaligya. Kun adunay buyer ang maong property ug inyo’ng ibaligya karon, mamahimo man nga ibaligya kini kaninyo’ng mga heirs, pinaagi sa pag-execute og Extra Judicial Partition with Sale nga pirmahan ninyo’ng mga legal heirs nga naglakip sa imong mama ug sa imong mga igsuon. Pinaagi niini, mamahimo’ng legal ang inyo’ng pagbaligya sa property nga nakapangan  sa inyong amahan nga patay na.  Thanks and God Bless.

* * *

Alang sa imong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana matag Miyerkules ug Domingo pinaagi sa akong column.