Ang ehersisyo sa mata

Matud pa, ang atong mata maoy bintana sa atong kinabuhi. Mao usab kini sagad ang gisandigan sa pagtoo sa masa sanglitanan nga sa iningles pa, “To see is to believe”. Sa ato pa, dili kita motoo hangtud may makita. Hinoon, husto sab pero kinahanglan nga ampingan nato ang kahimsog sa mata nga makakita kini nga tin-aw ug klaro, nga way hasol sa pag-ila kay lagi nahanap na ang panan-aw. Usa sa buhaton aron mohimsog ang mata, mao ang kanunay sa pagkaon nga masustansya alang sa mata. Apan dili paigo nga magsalig lang sa nutrisyon kay may ehersisyo ka pang buhaton aron mahingpit ang kondisyon sa mata nimo. Ang pagtan-aw sa adlaw nga nagpiyong sud sa 15 ka segundos sa buntag ug sa hapon, igo na nga may bitamina D nga makatabang, pagklaro sa bulok sa imong gitan-aw nga hayahay ug relaks kaayo. Duna pay uban nga buhaton nimo:

Kanunay ikipat-kipat o ipamilok ang mga mata mo, matag karon ug unya sud sa 2-3 ka segundos. Ayaw sige’g tutok o magsiga permi sa pagtan-aw kay kapoyon ang pinong mga ugat sa mata, nga magkadugay moresulta kana sa pagkahalap hangtud nga dili na ikaw makakita.

Ipunting panagsa sa ang panan-aw mo sa layo, lakip na ang palibot nga igo lang maapil sa pagtan-aw mo. Iliraw usahay nga di mahago ang mata nga ingon sa nagtutok ka lang permi sa imong tan-awon o sud-ongon.

Iilin-ilin o lain lainon ang pagtan-aw sa dapit o ang gulo, aron dili maluya ang mga mata mo nga ingon sa kadukaon unya molabad o mosakit ang ulo mo o kaha malipong ka.

Buhata ni kada adlaw hangtud maanad ka na, nga di mo lang unya mamatngonan, nga imo diay gihimo kanunay ang labing maayong pag-ehersisyo sa mata.

Makatabang sab sa ehersisyo sa mata mo ang hustong pagginhawa, ang paglihoklihok sa liog ug pagpakibo sa abaga mo kay nakakonektar kini direkta sa mga ugat o nerve sa imong mga mata. Ayaw gyud paabota nga igo kana lang unya sa pagmahay gumikan sa pagpasagad ini, nga dili kana unya hinoon makakita sa maanindot nga bulok sa kinabuhi.