Pribado’ng yuta gihimong socialized housing sa gobiyerno

Dear Atty. Divine,

Duna lang unta ko’y pangutana labot sa yuta nga gihimo’ng socialized housing diha sa Mandaue City. Kining yutaa amo ning giprenda sa among ig-agaw ug wala kami masayud nga iya diay kining gipapuy-an og gipatukoran og mga balay ug nasayran na lang namo kini sa diha’ng duna nay mianha kanamo nga broker kay naapil kini sa project sa gobiyerno nga socialized housing. Tungod kay wala man kami mahimo, misugot na lang kami nga ibaligya sa mga nagpuyo ang yuta ug niadtong 2004 nahimo-an kini og Deed of Conditional Sale uban sa Homeowners Association. Ang mga broker maoy mipasalig nga maoy mo-process alang sa pagpatitulo. Apan hangtud karon wa pa man g’yuy titulo nga migawas bisan kun aduna na kini Court Order niadto pang 2012. Ang akong pangutana Atty, kun pila man diay ka tuig una moguwa ang titulo sa yuta? Mamahimo ba diay nga angkonon deretso sa mga molupyo ang among yuta bisan kun wa pa sila makabayad? Daghang Salamat--Tino

Dear Tino,

Kun aduna nay Court Order ug nahimo nang final ang maong kamandoan alang sa pag-release sa titulo, ang Register of Deeds maoy mopagawas sa titulo niini ug labing dugay nga ma-release kini mga upat ka buwan. Hinuon wala ko masayud kun ngano’ng nangabot sa korte ang maong issue ug wala sab kita masayud kun unsay mga kakulian nganong wa pa ma-release hangtud karon ang titulo nga inyong gipaabot . Apan kun ang mga nag-okopar sa inyo’ng yuta, wala pa hingpit makabayad sa kinatibuk-an nga presyo niini dili pa g’yud nila hingpit nga maangkon ang luna nga ilang gipuy-an ug dili pa usab kini mabalhin sa ilang pangan. Sa higayon nga makompleto na sila sa pagbayad, kamo isip tag-iya sa yuta kinahanglan pa nga mo-execute og Deed of Absolute Sale ug mao kini ang basihan alang sa pagtransfer ngadto sa pangan sa mga ukopante. Ang maayo ninyong buhaton karon mao ang pag-pakisusi sa Homeowners Association aron inyong masayran kun nganong nadugay ang pag-release sa title ug adto ‘sab kamo magpatabang sa Association aron inyong mapaningil sa mga okopante ang kinatibuk-ang bayad  sa inyong property. Thanks and God Bless.  Atty. Divine

Alang sa imong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutanan matag Miyerkules ug Domingo pinaagi sa akong column.