Gininhawa

Sa dihang gihuypan sa atong Ginoo ang mga tinun-an usa kini ka buhat nga tabunok kaayo sa simbolo. Ang paghuyop adunay dakong kalambigitan sa gininhawa. Ang pulong Espiritu, gikan sa mga pulong Griyego PNEUMAH ug sa Hebreyo nga RUAH nga dunay emphasis sa “H” uban ang pagginhawa. Nga sa ato pa ang Espiritu maoy principle of life. Kun wala’y Espiritu, wala’y kinabuhi, kun wala’y kinabuhi, patay ang tanan. Ingon ini usab ang buhat sa Balaang Espiritu diha sa atong kinabuhi ingon nga mga katawhan ug ingon nga Simbahan. Ang Espiritu maoy kinabuhi, kainit, lamdag ug maghuhupay kanato sa tanang mga katuigan sa atong panaw sa pagtuo. Gasa siya gikan sa kahitas-an nga padayong nihatag kanato og kainit ug kaikag. Ning atong pagsaulog sa Domingo sa Pentekostes, mahinungdanon kaayo ang makanunayong pagsangpit kaniya labi na sa mga higayon nga atong pagahimuon ang mga mahinungdanong desisyon sa atong kinabuhi.