Bisan si Rizal dili ka sulbad

Sama sa naandan, gisugat sa nagkalainlaing problema ang pag-abli pag-usab sa klase karong tuiga. Nag-una niini ang kakulangon sa mga classroom nunot niining nagtubong gidaghanon sa mga estudiyante.

Dinhi sa Sugbo, permanente na ang suliran sa ka kulang sa mga classroom. Daghan sa mga eskuwelahan ang tua na magklase ilalum sa mga kahoy tungod lagi sa nagsugwak nga mga tinun-an. Hagbay ra kining maong problema. Apan wala gayud kini masulbad sa nasyonal nga kagamhanan bisan pa man sa nagkadakong budget nga gigahin sa Department of Education matag tuig.

Sa pagkakaron, daghang shift ang gipatuman matag adlaw sa mga eskuwelahan sa mga highly-urbanized areas sa nasud. Kini tungod sa kadaghan sa mga estudiyante apan dili paigo ang mga classroom. 

Gani, dili lamang ang kakulangon sa classroom ang nag-unang suliran karon. Dugang usab niini ang kakulangon sa mga magtutudlo tungod kay daghang education graduates ang walay interes pagtudlo karon tungod sa ka gamay sa suweldo. Sa nanglabay nga mga tuig, daghan sa mga magtutudlo ang mibiya sa ilang trabaho dinhi sa nasud ug nanimpalad sa gawas tungod kay in demand karon ang mga English teacher sa ubang kanasuran nga nagtangag og dakong suholan.

Hinuon dili usab nato mabasol ang ubang mga titser nga manimpalad na lamang sa gawas. Aduna usab silay mga pamilya nga gibuhi nga kinahanglan nga kahatagan og maayong ugma.

Grabe nga kakulangon sa mga classroom ug mga magtutudlo. Kini mao ang nag-unang suliran sa sistema sa edukasyon sa nasud karon. Hagbay ra kining maong problem nga mora’g wala nay kasulbaran.

Bisan kinsa pa ang magdala sa renda sa pangagamhanan ning nasud, dili na siguro masulbad pa kining maong suliran. Gani kaniadto bisan kinsa na lamang nga presidente ang nagsige og ngalngal nga dala nila ang kasulbaran sa maong suliran.

Apan hangtud karon wala gayuy kabag-ohan. Padayong nagkagusbat ang sistema. Bisan kun mabanhaw pa si Rizal ug mamahimong presidente, di ko motuo nga masulbad niya kining tanan.  Ug kun mangutana kamo kun aduna bay paglaum sa sistema sa atong edukasyon, ambot lang.