Suliran sa edukasyon

Ang Department of Education (DepEd) nasayud nga matag tuig mosaka ang gidaghanon sa mga estudyante gikan sa elementarya hangtod sa sekondarya.

Makatarunganon lang nga matag tuig dugangan usab og mga lawak klasehanan ang matag tulunghaan tungod kay nasayran na nga adunay dugang motungha nga estudyante sa matag tuig.

Apan wala kini mahimo sa DepEd, ug gipasagdan lang nga inig-bukas sa klase maghuot ang mga estudyante sa matag lawak klasehanan kay wala may giandam nga lugar alang sa bag-ong enrollees.

Sa K to 12 nga curriculum labaw na nga wala kapangandami sa kagamhanan tungod kay gawas nga wala’y dugang edipisyo ug lawak klasehanan, wala usay mga libro nga magamit ang mga estudyante.

May mga libro nga Binisaya, apan ang klase sa Binisaya nagyaya lang kay dili mga lumad Bisaya ang nagsuwat.

Daghang nangutana nganong tun-an pa man ang Binisaya nga una sa tanan mao man kini ang atong gilitok matag karon ug unya sukad sa atong pagkatawo gikan sabakan sa atong inahan, ug ikaduha dili man kini maoy sukdanan sa atong panarbaho?

Ang kakuwang sa budget alang sa mga building ug classroom nga gikinahanglan matag tuig naggumikan sa kakuwang sa kuwarta sa panudlanan sa kagamhanan.

Busa angay mauwaw ang mga opisyal nga kawatan ug kadtong nagplano pa nga mangawat sa salapi sa kagamhanan tungod kay kuwang kaayo ang buhis sa mga Filipino aron ikapabangon sa nasukamod natong mga pasilidad sa edukasyon. Gawas sa suliran sa edukasyon ang naghitak nga kakabus maoy angay hunahunaon niadtong mga politiko nga naghugaw-hugaw lang sa dungog sa mga Filipino.  ([email protected])