EDITORYAL - Duna bay angay tagoan?

Way kwestyon ang kamatinud-anon sa hugpong sa mga doktor, mga abogado ug mga pribadong propesyonal kung ang kontribusyon pagpalambo sa nasud nga gitinguha sa gobiyerno maoy isyu.

Apan dili ikalimod nga dunay pipila ka lugas niining maong mga pundok ang wala maghuna-huna sa kaayohan sa kinabag-an kondili ang personal nilang kalamboan kay gustong dali nga madato.

Di pa lang dugay, ang Korte Suprema mipagawas og temporary restraining order kalabot sa implimentasyon sa bag-ong regulasyon sa Bureau of Internal Revenue (BIR) nga nagmando sa mga doktor pagsunod sa dugang pang mga rekisitos.

Ang Philippine College of Physicians (PCP) ug ingon man ang Integrated Bar of the Philippines (IBP) mipetisyon sa Korte Suprema nga nag-awhag nga ipadeklarar ang maong regulasyon nga “unconstitutional” kay lagi daghan daw mga probisyon ug mga katungod nilang propesyonal ang nalapas sa BIR Regulations.

Ang regulasyon nagmando kanila nga ipaskin ang rate sa ilang serbisyo sa ilang mga kustomer, kliyente, ug pasyente diha sa ilang mga buhatan. Tumong sa BIR nga transparent ug walay manikas sa pagbayad sa ilang mga buhis kay kini nga sektor maoy gituohan nga nag-unang tax evaders.

Kung matinud-anon pa gyud ug mga “law abiding citizens” kining mga self-employed professionals sama sa ilaha karong giinsister, nganong dili man nila sundon ang regulasyon? Kay ngano, di ba sila gusto nga masayran sa publiko kung kinsa kanila ang mahal maningil? Hadlok ba silang gamiton ang nakabutang nga rate sa ilang mga paskin aron dili sila makapatuyang pagbayad sa ilang serbisyo? Wa man siguro ni sila tugoti sa gobiyerno niini, way rason nganong di nila kini ipaskin.

Alang sa mga ordinaryong mga tawo nga wala gani tinipigang kwarta, maayo na kaayo kanila nga mahibaw-an kinsa nga tawo ang ilang maduol sa maabot sa ilang bulsa.