Taphaw nga imbestigasyon
Tungod sa hukom sa mga ginikanan sa bata nga giingong gitaptapan og tape ang baba sud sa nursery sa Cebu Puericulture Center and Maternity House Inc. (CPCMHI), gihunong na sa nagkalainlaing buhatan sa gobyerno ang hiniusa nilang imbestigasyon sa kontrobersiya. Nagdumili na gani ang interagency task force pagpagawas sa resulta sa ilang imbestigasyon hangtod nga pormal nang mapasaka ang kaso sa korte.
Pasayloa nga maglisod ko og sabot sa salida sa interagency task force. Unsa man diay tuyo sa ilang hiniusang imbestigasyon? Pagsusi kinsay responsable sa pagtaptap og tape sa baba sa bata? O paglingaw-lingaw lang sa publiko samtang wa pay kaso nga napasaka sa korte?
* * *
Kun ang tumong sa hiniusang imbestigasyon mao ang pagpanalipod sa katungod sa batang masuso, nga wa gyud intawoy dag-anan pagpanalipod sa iyang kaugalingon gikan sa nagtaptap og tape sa iyang baba, nga maoy gusto nakong tuohan nga katuyoan sa Department of Health (DOH), Commission on Human Rights (CHR), Department of Social Welfare and Development (DSWD), nganong wa man nila tiwasa ang nakabuylo na untang pakisusi?
Mag-agad ba diay ang pagpakabana sa gobyerno pagpanalipod sa mga batang pasyente kun mokiha o dili ang mga tagtungod? Mawa ba diay ang obligasyon sa gobyerno pagpanalipod sa mga batang pasyente gikan sa posibleng pagpangabuso tungod lang kay nakakuha na og abogada ang mga ginikanan?
* * *
Unsa may nahipos nga kasayuran sa interagency task force human sa duha ka semana nilang imbestigasyon? Bisan gihunong nila ang pakisusi duna na gyod tingali sila’y nahibaw-an labot sa kontrobersiya. Nganong nikalit man sila og tak-om human nipahibawo ang abogada sa mga ginikanan nga mopasaka na sila og kaso?
Kay wa man mahuman ang ilang pakisusi, di kinahanglan nga modeklarar ang mga sakop sa interagency task force kinsa ang responsable sa pagtaptap og tape sa baba sa bata ug kun naabusohan bang mga katungod sa batang pasyente. Apan di makiangayon alang sa mga magbubuhis, nga maoy nagsuweldo sa mga imbestigador, nga tagoan unsay pasiunang kasayuran nga nitumaw.
* * *
Sa wa pa dalidalia og tak-op ang imbestigasyon, nauyonan unta sa mga sakop sa interagency task force ang paghimo og ocular inspection sa nursery sa CPCMHI nga gitumbok nga nahitaboan sa pagtaptap og tape sa baba sa bata. Nga makatabang unta sa pagtino sa nahimutangan sa bata, kinsay nurse nga nag-atiman niya ug kun may nagtipun-og bang tapes ug pacifiers duol sa mga bata.
Nganong nikalit man lang kawagtang ang kapuslanan sa ocular inspection dihang nideklarar nang mokiha ang mga ginikanan sa bata? Nahadlok bang mga imbestigador nga magamit sa kaso ang ilang mahipos nga mga ebidensiya? May lain pa ba diay nga katuyoan ang ilang imbestigasyon gawas sa pagpangita sa kamatuoran?
* * *
- Latest
