Dinakpan dugay makasohan

Daghan na ang nadakpan sa mga sakop sa City Environmental Sanitation Enforcement (CESET) tungod sa pagpataka’g labay sa ilang basura sa dakbayan sa Sugbo apan wala pa sila mapasakai og kaso.

Abi ninyo og ngano? Dugay kaayo nga makapa-notaryo ang CESET sa affidavit sa ilang mga enforcers aron nga mapasakaan og kaso didto sa piskaliya ang mga nasakpan nila nga nagpataka lang paglabay sa ilang mga basura.

Matud ni Grace Luardo, ang pangulo sa CESET ug supervisor sa mga Barangay Environmental Officers (BEO), nga dugay kaayo ang mga abogado sa City Legal Office nga mopirma sa ilang gipreparar na unta nga pro-porma affidavits.

Nagpakabana gayud ko niini’ng mao nga isyu. Gusto man gud nako nga kun adunay pagpangdakop, tinud-on g’yud pinaagi sa pagpasaka og kaso sa mga nasakpan ug dili kay kutob ra sa balita.

Personal g’yud nako nga gi-follow up niini’ng mao nga isyu si City Legal Officer Gerone Castillo ug gipangutana ngano nga dugay man kaayo sila nga maka-notaryo sa affidavit?

Gitug-anan ko ni Atty. Castillo nga dili man sila dugay mo-notaryo ug nagduda siya nga basin tungod sa kadaghan sa ilang pirmahanan mao nga usahay malangan lang.

Apan matud ni Luardo nga aduna diay abogado diha sa City Legal Office nga dili mopirma sa pro-porma nga affidavits nga gipreparar sa CESET kun wala diha ang apprehending officers.

Kun ingon niini ang rason, natural ra man tingali kay gilatid man gayud kana sa Supreme Court nga ang mga Notary Public kinahanglan nga mangita g’yud sa tawo nga mihatag sa iyang pamahayag sa dili pa notaryohan ang affidavit. Nakasabot ko ni Luardo nga nabalaka kay basin og molapas na ang duha ka buwan gikan sa pagkasakop sa tawo nga nagpataka og labay sa basura ug dili na sila makonbikto pa.

Aw kana kun ang ipasaka sa CESET mao ra ang kalapasan sa City Ordinance 1361. Ang balaod nagkanayon nga “light offenses will prescribed in two months.”

Apan kun ang ipasaka kalapasan sa Republic Act 9003, kon Ecological Solid Waste Management Act, duha ka buwan kaha gihapon ang prescription period Ma’am Grace? Bugsi kuno ang imong law books.