Pagsuway ug pagdaog

Tagbilaran City, Bohol--Si Ranulfo nakadawat na sa pait nga kamatuoran nga way katakos ang iyang mga ginikanan sa pagpaeskuyla niya sa kolehiyo. Apan di siya andam nga motahan sa iyang damgo nga makatiwas og kurso. Maong nakahukom siya sa pag-umol og mas sanag nga ugma.

Nitrabaho siya sa usa sa mga kompaniya sa Mactan Export Zone (MEZ) sa Lapu-Lapu City apan nataktak dihang gihakop ang kompaniya sa ekonomikanhong krisis. Nilangyaw siya sa Metro Manila. Apan human sa pila ka tuig natangtang na sab sa trabaho. Maong napugos siya pagbalik sa Bohol. Ug sa pangedarong 28, nihimo og laing pagsuway pagtiwas sa iyang pag-eskuyla.

* * *

Nakasulod siya og laing trabaho isip katabang sa panimalay sa usa ka magtutudlo dinhi. Namaligya ‘sab og mga pamantalaan sa weekends. Nadawat niyang suholan gikan sa magtutudlo maoy gibayad sa matrikula sa unibersidad. Ug ang iyang halin sa pamantalaan maoy gikuhaan alang sa inadlaw niyang pagkaon.

Aron makalahutay, magtingob siya og palit sa labing baratuhong isda. Nga iyang usahon pagluto alang sa tibuok semana niyang konsumo. Bisan sa tanan niyang kalisdanan, wa mapawong ang determinasyon ni Ranulfo sa paghaw-as sa iyang kaugalingon gikan sa masulub-ong kahimtang nga hugtanon niyang gisalikway nga maoy mamahimo nga permanente niya nga destinasyon.

* * *

Maong wa mahibung ang mga tagduma ug mga magtutudlo sa Bohol Island State University (BISU) ni ang iyang mga ginikanan nga nag-abot ang dan ni Ranulfo ug sa scholarship program sa ABS-CBN Sagip Kapamilya Foundation. Apan way sayon alang niya. Dihang nakapasar na siya sa screening, gitay-og ang Bohol sa makalilisang nga linog.

Napadaplin ang scholarship program kay nahigot mi sa mas dinaliang panginahanglan, pagtabang sa mga Bol-anon nga nabiktima sa linog sa Oktubre ug sa mas daghang mga biktima sa nisunod nga bagyong Yolanda pagka Nobiyembre. Apan wa gihapon molugak ang pagsalig ni Ranulfo nga makaangkon sa iyang makiangayong luna ubos sa adlaw.

* * *

Sa kataposan, nahibalik mi dinhi. Walo ka buwan human sa paglusad sa scholarship program, pito ka buwan human sa linog ug unom ka buwan human sa bagyo. Bayran namo ang matrikula nilang Ranulfo ug kaubanan sa niaging semestre. Ug makapahimus na sila, uban sa bag-ong scholars nga nakapasar sa bag-ong hugna sa screening, sa tibuok scholarship sugod sa bag-ong semestre sa tuig tingtungha 2014-2015 nga magsugod sunod buwan.

Usa sa ilang benepisyo mao ang P2,000 nga binuwan nga allowance. Nga maggamit alang sa ubang gastohan sa eskuylahan, sa plitehan, abang sa boarding house ug ubang inadlaw’ng panginahanglan. Hinaot nga mas madasig silang Ranulfo ug kaubanan. Di lang sa pagpadayon sa ilang pag-eskuyla kun dili sa pagpalambo sa pagtabang sa ilang mga ginikanan ug sa ilang mga kapamilya nga labing nagkinahanglan.

* **

[email protected]