EDITORYAL - Paagi pagsulbad sa traffic problem

Nagplano ang City Traffic Operations Management (CITOM) nga pausbawan ang bayranan sa mga tag-iya og sakyanan nga mo-parking  daplin sa karsada sa dakbayan sa Sugbo aron wala na’y ganahan nga moparada sa kadalanan.

Tumong ni CITOM Chairman Ruben Almendras nga kadto’ng mga motorista nga mahalan ra sa P40 nga parking fee mata’g oras dili na moparada daplin sa karsada ug adto na sa mga pribado nga parking area ug makatabang kini pagsulbad sa problema sa trapiko.

Ang pangutana kun ang mga nagdumala og private parking area dili ba usab kaha mopausbaw sa ilang bayranan ug menosan lang og gamay ang gikolekta sa CITOM? Adunay sugyot nga inig-park pa lang sa motorista kolektahan na kini og P40 apan alang kini sa una nga duha ka oras.

Paglapas na sa duha ka oras ug kun dili gusto ang mao nga motorista nga makabayad og tag P40 na ang parking fee kada oras, kinahanglan siya nga mobiya ug mangita’g lain nga lugar nga kaparkingan aron P40 lang gihapon ang iyang mabayran sa laing duha ka oras nga pag-parking.

Nindot kini nga paagi kay pagka karon, migamay na kaayo ang atong mga karsada kay ang mga daplin niini ginegosyo na man sa CITOM. Pagka karon ‘tag P20 ang bayad sa kada oras nga pag-park.

Apan wala kaha’y binuang nga motumaw niini? Karon gani duna may uban nga traffic aides nga dili tiketan ang uban nga motorista nga tag-iya’g patigayon basta hatagan sila’g tip.