EDITORYAL - Inato nga pagwapa

Sa mga babaye, mabata o maedaran man,walay dili gusto nga magwapa. Apan ning panahona, gastoso kaayo ang pagpagwapa. Hinoon niadto nga duna gyu’y ikasarang, ang tanang paagi buhaton bahalag pilay magasto. Mao na nga ang uban, makadungog na gani nga mao kana, mogamit lang sad dayon unya naminghoy. Kay unsaon man nga inay magwapa nadaut hinoon ang dagway.

Sa ubang mga babaye, gihimo nila kini nga prayoridad. Kanunay moadto sa mga  beauty parlor aron sila makaseguro sa ilang pagpagwapa. Magkalisod moadto pa sa doctor, magparetoke pinaagi sa kosmetik o kaha plastic surgery. Apan sa mga tihik o daginoton ang pangwarta, adunay inato nga paagi nga mas makaseguro ka nga natural ang kagwapa mo kay naa ra man ni sa kusina nimo.

•Pepino o Cucumber/ Tea bags –  Kun ang ubos sa mga mata nato morag nanghubag nagbitay, dili na kinahanglan mogasto pa og dako aron sa pagpaopera. Pwede ra kini pahiyuson pinaagi sa pagbutang og hiniwa sa pepino, sud sa 30 minutos sa dili pa matulog dayon. Unya usahay pod nanglagom ang palibot sa mga mata nato kay kulang sa tulog o kaha kanunay namuwaw, patungi la’g tea bags.

•Asukar o Honey – Kun ang atong nawong  nag-uga lang nga morag nagluno nga morag tiguwang na tan-awon. Pagkuhag asukar ug butangi’g diyotay nga tubig nga igo molaput o honey, unya hinaya nga inusnos sa nawong o ubang parte sa lawas, para matangtang ang mga patay nga selyula sa panit. Mahimo sad ang honey isagol sa abokado, ipahid aron mobatan-on o mohumok o lumoy ang pamanit mo.

•Pinya ug lemonsito – ang duga niini mahimong panglimpyo sa nawong ug aron sad pagamyon kanang mga lungaglungag (skin pores)sa nawong.