Whistleblower

Lahi ang drug addict kay sa masakiton og HIV/AIDS o kaha matakboyan sa ubang sexually-transmitted disease.

Ang tawo nga drug addict mosangpot sa iyang pagkabuang, kun dili siya mohunong sa pagtumar og gidili’ng drugas kay mangalawos man ang pino nga ugat sa iyang utok tungod sa kaisog sa gidili’ng drugas.

Dili na makaagi ang dugo nga mopaingon unta sa utok alang sa normal nga panghunahuna sa tawo.

Inigkayabag na, aw ang uban maghikog pinaagi sa pagbitay o kaha moambak sa taytayan kay molikay sa tawo nga buot kuno’ng mopatay kaniya.

Kabahin sa HIV ug AIDS, ang mga doktor adunay tambag sa mga lalaki ug babaye nga buot molikay sa sakit nga Human Immunodeficiency Virus ug Human Immune Deficiency Syndrome.

Tambag sa mga doktor sa mga lalaki nga magsul-ob g’yud og condom kun makigdulog kini og lain nga babaye nga dili sigurado nga sila luwas sa kagaw HIV/AIDS aron dili mamilegro.

Unya kay wala man kuno’y lami kun mag-condom? Aw asa man ang imong palabihon, ang pagkakuwang sa lami o ang imong pagtibi unya?

* * *

Ang Ombudsman miingon nga walay laing sulbad aron masanta ang pagdagsang sa mga kawatan nga opisyal sa gobiyerno kun dili ang pagpapriso g’yud kanila.

Sumala pa ni Deputy Ombudsman for the Visayas Pelagio Apostol nga kun aduna la’y ebidensya nga mosuporta sa mga pasangil batok sa mga sinumbong angay’ng silotan gayud ang nakahimo’g salaod.

Kinahanglan nga walay mga huwes nga modawat og suborno gikan sa mga akusado. Ang huwes nga modawat og suborno gikan sa mga kiriwan sa kuwarta sa publiko, bugti sa dili pagsilot kanila, sama ra nga nakasalmot siya sa maong krimen.

Busa padayong giawhag ni Apostol ang publiko nga motabang ug kinahanglang mag-"whistleblower" aron kadto’ng mga maghuhukom nga corrupt kay midawat og suborno gikan sa kawatan, mabalhug usab sa prisohan.

* * *

Kaisog sa mga Vietcong no? Dihang ilang nasayran nga gimuntaran na sa China og mga ekipo aron suyopon ang pundo nga lana sa usa sa mga isla nga gi-claim sa Vietnam nga ila, gipamatay nila ang daghang mga Insek didto sa Vietnam.

Busa gihakot sa lima ka dagko’ng barko sa China ang kaliwat nila’ng Insek gikan sa Vietnam aron paglikay nga sila mangamatay gikan sa panimalos sa mga Vietcong kanila.

Apan ang mga Filipino, anad kaayo kita sa pagka-maayo’ng tawo gumikan sa atong "hospitable" nga kinaiya.

Bisan og giilogan na kita sa atong teritoryo, paubos gihapon ta.

* * *

([email protected])