Ayaw tabuni ang responsable

Nagkaseryoso na gayud kining kontrobersiya sa giingong pag-tape sa usa ka nurse sa baba sa naghilak nga puya diha sa Cebu Puericulture Center and Maternity House Inc. dili pa lamang dugay.   

Kini sa dihang miintra na ang Senado niining maong anomaliya. Si Senadora Nancy Binay, sa iyang resolusyon, gusto og imbestigasyon sa komitiba sa Senado sa maong kontrobersiya.

Kun moabot sa Senado kining mao nga isyu, nationwide na unya ang exposure niini. Ug nga daghan gayud unya ang motutok ning maong kontrobersiya, dili lamang ang mga Sugboanon.

Sama kanako, siguro daghan kanato ang uyon sa imbestigasyon sa Senado ang maong anomaliya . Kini aron matugkad gayud ang tinubdan niining maong isyu. Ug nga aron malikayan ang susamang panghitabo sa umaabot nga panahon.

Sa pagkakaron, mora’g nagyagaw na ang dagan sa maong kaso. Gani, gihimakak sa maong hospital, sa ilang opisyal nga pahayag, nga usa sa ilang staff ang mi-tape sa baba sa maong bata. 

Kini sukwahi sa akusasyon sa mismong mga ginikanan sa maong bata nga usa sa mga nurse sa maong hospital ang mitabon gayud og tape sa baba sa maong bata tungod kay nagsige kini og tiyabaw.

Kinsay nagsulti sa tinuod, ang ginikanan ba sa bata o ang management sa maong maternity house? Hinuon gipailalum na karon ang maong kontrobersiya sa dakong imbestigasyon sa Department of Health.

Apan kun buot natong sabton, wala siguroy ginikanan ang makaako pag-tape sa baba sa ilang puya. Dili kana hayop nga dili sila mobati og kaluoy, ilabina nga sensitibo kaayo ang panit sa bata.

Usa ka nurse ang giakusahan sa maong ginikanan ug daghan ang mituo niini. Ug kini unta ang angay nga susihon sa management sa maong hospital, kun tinuod ba ang maong alegasyon.

Ug kun tinuod man gani, angay lamang nga palagputon ang maong responsable. Dili kay moisyu na hinuon og statement ang hospital pag-deny nga ilang personnel maoy nag-tape sa baba sa bata.

Sama rang mitabon ang management sa maong salawayong binuhatan. Dili kini maayong tilimad-on. Ug wala kini ikatabang pagprotiher sa reputasyon sa maong maternity house.