Solo parent cash assistance di maayo
Ang pre-marital sex usa ka dakong sala nga nagsupak sa sugo sa Ginoo. Ang paghatag og cash assistance ngadto sa mga inahan apan dili asawa mahimo na unyang uso ug sayonsayonon na lang unya, kun mahimo na gyud kining balaud. Hasta ang pagpabuntis sa ilang uyab, bahala na’g dili pangasaw-on...mosamot sab kakusog! Wala nay solo parent nga manarbaho. Magsige na la’g bikangkang. Total, kun momabdos, suportahan man sa balaud nga gipanday-sugyot ni Konsehal Carillo.
Alang ning tagsulat, wala magtudlo ning balaura nga magkugi ang solo parent. Gitun-an hinuon sila nga matapolan ug magsige na la’g buhat og baby. Lipay kaayo ang mga Badjao ini. Inig abot sa hustong edad nga puwede na silang makabotar, tanang kaliwat nila, kinsa pulos solo parent, mobalhin dinhi sa siyudad sa Sugbo aron anhi moboto. Buwahan, kun makatulo ka tuig na silang makapili’g kandidato, mahatagan na sila’g cash assistance sa gobiyerno. Dili kaha maunlod ang panudlanan sa City Hall? Nga naglisod man gani si Mayor Mike pagtuman sa tukmang gisaad nga kantidad, isip cash assistance ngadto sa atong senior citizens.
Hain ba ang mas daghan: Ang mga tigulang o mga batan-ong voters? Angay isilsil sa alimpatakan nga ang mga senior citizens di na makabuhat og bata, pero ang mga batan-on, makapatuyang pa kini sila sa pagdaghan. May tinumpi bang binilyon ka pesos ang pundo sa City Hall alang ning Solo Parent Cash Assistance nga mahimo unyang obligasyon sa gobiyerno? Kun wala, dili na lang ta patugatuga, Konsehal Carillo ug Mayor Mike, uy!
Hustong edukasyon o pamaagi sa desenteng kapanginabuhian ang angay natong ihatag nila. Ug dili cash assistance. Pareha ba sa mga Insek. Kun makapaanak sila’g dalaga, ilang pabuhata’g tindahan ang ilang kabit...aron dili na kini magsige’g salig kanila. Di ba, mas okay?
- Latest
