“Overkill”

Ang nahitabong pinusilay tali sa giingo’ng mga tigpayuhot og drugas ug sa mga sakop sa City Anti-Illegal Drug Special Operations Task Group sa dakbayan sa Lapu-Lapu mipukaw sa naghikatulog nga kalinaw sa maong siyudad nga sentro sa turismo sa rehiyon. Duha ka tawo (Romeo Daleon, 30, taga Looc, Lapu-Lapu ug Marlon Ampatuan Yungco, 29) ang namatay samtang laing duha – apil ang usa ka polis nga si PO3 Joseph Villamor – ang naangol sa maong hitabo. Ang laing angol giingong kauban sa duha ka drug pusher nga giatiman karon sa mga doctor sa Vicente Sotto Memorial Medical Center tungod sa mga samad pinusilan.

Sumala sa pasiunang imbestigasyon sa Homicide Section sa kapolisan sa Lapu-Lapu, nasayran nga natusak-tusak sa bala ang duha ka nangamatay nga giingong drug pusher.

Sa balita, si Yungco nakabantay nga ang poseur buyer mao si PO3 Villamor mao nga iya kini’ng giunhan og pusil gamit ang .45 kalibre nga pistola. Apan sa dihang mibalos ang kaubanan ni PO3 Villamor, gipaulanan nila og bala ang awto nga gimaneho ni Yungco diin si Daleon nga maoy subject sa buy-bust operation didto maglingkod sa luyo’ng bahin.

Adunay balita nga akong nadunggan nga ang pamilya sa mga nangamatay modangop sa Commission on Human Rights (CHR) aron pagsusi kun wala bay “overkill” nga gihimo kay ilang nahibaw-an nga natusak-tusak sa bala ang lawas ni Daleon, nga sa luyo sa kotse maglingkod, ug si Yungco ug kauban nga si Romulo Marinay.

Si Marinay nga anaa karon sa VSMMC giingong andam motestigos sa pamilya sa mga nangamatay sa pasangil nga “overkill.” Maayo hinuon kini, kay kun tinuod nga adunay overkill masayran nato kun nagsunod ba o wala sa Rules of Engagement ang mga polis, ug kun nagsunod man, malimpyohan ang ilang mga ngalan.

* * *

Kun magtabon-tabon ang Cebu Maternity and Puericulture Center sa nahitabong pagpapilit og plaster sa baba sa usa ka bata’ng bag-ong natawo, angay kini’ng patubagon sa Department of Health ug sa CHR. Simple ra kaayo ang gipangayo sa publiko – ibutyag ang ngalan sa nurse nga giingong mitabon sa baba sa bata gamit ang plaster, apan nagpagahi-gahi kini sa paghatag. Ngano kaha?

Maayo nga mabadlong kini’ng mao’ng nurse kay kini’ng maong hitabo nakapa-utingkay sa industriya sa panglawas ug tambalanan sa Sugbo. Ang gilapas niini mao ang katungod sa usa ka bata, binuhat nga dili makasukol bisan unsang klase nga abuso ang buhaton kaniya.