Promotion sa enrollment

Samtang adunay kapin sa 100 ka tunghaan dinhi sa Central Visayas nga nangayo og pagtugot sa Department of Education ug Commission on Higher Education nga makapausbaw sa ilang matrikula, ang uban nga tunghaan wala mopaumento sa ilang bayranan.

Ang wala pagpaumento sa matrikula niini’ng mao’ng mga tunghaan nahimong kabahin sa ilang promo nga gitumong aron pag-agni sa mga ginikanan ug tinun-an nga adto sa ilang tunghaan motungha. Kun kaniadto walay tunghaan nga nag-advertised, karon halos tanan mihimo na niini ug nag-hire pa ang uban og mga artista aron lang mo-endorso sa ilang tunghaan. Kining tanan tungod sa kompetisyon. Tungod sa kadaghan na sa mga tunghaan gikinahanglan nga sila mailhan ug usa sa ilang promo mao nga wala’y umento sa matrikula.

Ang “No Tuition Fee Increase” nga promo sa mga tunghaan kinahanglan nga tan-awon sa mga opisyal sa DepEd ug sa CHED kay lipat-lipat kini sa mga tag-iya sa tunghaan nga dili gusto nga mohatag og umento sa suweldo sa ilang mga teaching ug non-teaching personnel, gawas sa pagpangilad ngadto sa mga tinun-an ug mga ginikanan.

Isip presidente sa Supreme Student Government kaniadto ug sakop sa kahugpongan sa mga presidente sa Supreme Student Government- Council sa Sugbo ug sakop sa National Union of Student of the Philippines akong nasayran nga ang No Tuition Fee increase nga promo usa ka lipat-lipat ug pangilad.  Among nasayran nga ang usa ka tunghaan nga nag “No Tuition Fee Increase” mipinta paghapak sa tanang umento nga ilang pangayoon sa kinatibuk-ang upat ka tuig nga kurso sa kolehiyo ngadto sa matrikula sa first year pa lamang. Kini aron dili na sila magsige og pangayo’g umento sa ilang matrikula matag tuig.

Sa ingon nga paagi ang wala makahibawo sa lipat-lipat, aw malipat gayud ug makapa-enrol sa mao nga tunghaan. Ang ubang tunghaan nag no tuition fee increase pero ang ilang miscellaneous fees miumento og taga-liog busa ang resulta, ang mga tag-iya ra sa tunghaan ang nanambok samtang ang ilang mga magtutudlo ug ubang kawani nagniwang ug nangapasmo kay wala umentohi sa ilang suholan. Ubos sa Education Act of 1982 ang pangayoong umento sa matrikula, ang 70 porsiyento niini mapunta sa mga magtutudlo ug ubang mga kawani, 20 porsiyento ang gamiton sa pagpalambo sa mga pasilidad ug ang 10 porsiyento maoy mapunta sa tag-iya sa tunghaan o return of investment.