Temang nalambigit: reyalidad

Sa mga panahon nga ikaw nagdamgo diin nahatagan og igong pagtagad ang imong tiil, kini nagpasabot sa dakong panginahanglan nga ikaw motugdon sa reyalidad. Daghan kanato ang nahimong nipuyo sa kapunaw-punawan sa mga ideya apan pakyas diha sa pagtugdon sa aktwal nga kahimtang sa kinabuhi. Gani, usa sa mga approaches sa Psychotherapy mao man ang Reality Therapy diin gituki, gitan-aw ang aktwal nga kahimtang agi’g sukaranan diha sa pagpangita og sulbad sa problema nga giatubang.

Tinuod, sakit ang kamatuoran usahay apan wala kitay laing mahimo gawas sa pagharong niini kun buot natong mamahimong gawasnon. Ang hulagway sa usa ka tiil diha sa atong kinabuhi, nagpadayag lamang sa atong panginahanglan aron mamahimong grounded diha sa atong kasamtangang kahimtang.