EDITORYAL - Kutob ra diay sa panghulga

Kaniadto’ng Abril paspas kaayo ang mga sakop sa Cebu City Environmental Sanitation and Enforcement Team (CESET) pag-isyo og mga Citation Ticket sa mga tawo nga nagpataka lang paglabay sa ilang mga basura.

Bisan gani ang mga konsehal sa barangay nga nagdumala sa Committee on Environment apil nga giisyohan og Citation Ticket ug gihulga nga pasakaan sila’g kaso tungod sa wala pagtuman sa lagda nga gilatid sa Ecological Solid Waste Management Act ug City Ordinance 1361.

Ang publiko misaludo sa kaisog sa mga sakop sa CESET ubos sa pagdumala ni Grace Luardo kay bisan si Cebu City Councilor Dave Tumulak wala nila pasayloa diha’ng ilang nasakpan nga nanigarilyo ang konsehal luwan sa sakyanan sa kagamhanan.

Mga konsehal sa Barangay Guadalupe, Day-as, Duljo-Fatima ug uban pa nga barangay nga nagdumala sa Committee on Environment giisyohan og Citation Ticket kay napakyas pagsabwag og inpormasyon sa ilang lumolupyo nga dili magpataka og labay sa ilang mga sagbot.

Apan milabay na lang ang kapin sa buwan wala’y bisan usa kanila nga gipasakaan og kaso sa hukmanan. Ang Article 90 sa Revised Penal Code naglatid nga kun ang usa ka tawo nga nakahimo’g “light offenses” unya dili ikiha lapas sa duha ka buwan dili na sila makonbikto pa.

Kun ingon niini ang mahitabo, maisip nga kutob ra diay sa pagarpar ang pagpangisyo sa CESET og citation ticket? Angay’ng pangitaan dayon og sulbad kini’ng puntoha aron dili maisip nga ang kampanya sa CESET kutob lang sa pagpasiatab.