Mary Ann gianugnan ni Bontilao

Kauban ning tagsulat ug higala ni anhing slot machine officer attendant (SMOA) Gaudioso “Boboy” Bontilao, miasoy nga wala kuno mapugngi ni Konsehal Mary Ann de los Santos ang pagtulo sa mga luha dihang nasayran sa konsehala nga si Boboy namatay dihadiha kuyog sa kaubang Pagcorian, Jojo Lopez, human daroha ang gisakyan nilang motorsiklo sa naghaguros nga Honda Civic car sa dalan Salinas Drive, Lahug, ning dakbayan atubangan sa Chikaan Restaurant niadtong Abril 5, 2014.

Kini tungod kay nakit-an man ni Mary Ann ang kabuotan ug kaligdong sa pagkatawo ni Boboy. Si anhing Boboy adunay tindahan sa Mountain Barangay Adlawon, diin adto gyud mohugop halos tanang lumolupyo sanglit ubos man ang presyo sa iyang mga tinda. Nagpautang siya, apan dili kaantigo maningil. Wala siya’y kontra kay ang mangaway niya, iya mang amigohon. Gani, pahulamon pa man kini niya’g kuwarta kun manghuwam. Nindot kinaiya nga nakapabelib ni Mary Ann.

Hinungdan, nga gi-groom si Boboy ni Ann sama sa ginalam nga tanom sa halaman kay giplanohang maoy himuong barangay kapitan sa ilang dapit. Kadaghan na hangyoa si Boboy sa konsehala, pero wa motando ug wa sab mobalibad.

Sa miaging local election, adunay giandam si Mayor Mike Rama pinaagi ni Mary Ann nga election fund alang sa lugar nilang Boboy. Apan wala kini kuhaa ni Boboy. Dako iyang pagsalig sa Ginoo nga wala niya kinahanglana ang kuwarta sa pagpangampanya. Sa laktod, gisuportahan niya ang Team Rama pinaagi lang sa iyang mga kuhit ug hangyo ngadto sa tanan niyang katagibarangay. Tuod man, midaog si Rama ug de los Santos sa Adlawon nga wala gyud makuha ug kuhaa ni Boboy ang gigahin nga election budget para unta kaniya.

Unsaon, gusto man si Boboy nga modaug ang kandidato nga pinili gyud gikan sa kasingkasing. Ug dili gikan sa gahom sa salapi. Dinhi misamot ang pagdayeg ni Mary Ann sa talagsaong mithi nga nahuptan ni Boboy. Nalantawan ni Mary Ann nga may potensiyal si Boboy nga makadala sa renda sa ilang baryo subay sa matarong ug malinis dalan diha sa pagpangalagad. Apan kalit lang gisakmit sa kahitas-an ang kinabuhi ni Boboy. Ug gianugnan kaayo niini si Mary Ann.