Di’ magpalingla

Human maapiki, karon nakabawi si Janet Lim Napoles. Siya ang nagda’ sa duwa ining listahan sa mga senador, mga kongresista ug uban pang mga opisyal sa gobiyerno nga iyang giingon nga nakabenepisyo sa pork barrel scam. Ug kitang publiko nga dugay nang nagpaabot nga mabutyag ang panga’n ining mga tawo nga nakasapi sa atong sapi, nagpaabot ug nisunod sa unsay ibutyag ni Napoles.

Mura ‘tag iro nga gipa-ibog-ibog sa dakong bukog. Ug asa paingon ang bukog, tua pud mosunod ang atong mga mata ug nagpaabot kung kanus-a ihagbong aron atong tabangan sa pagkit-kit. Ug si Napoles, daw amo nga atong gipaabot nga mohatag ug mamahin sa iyang grasya. Sa paggawas pa lang sa panga’n ni Janet Napoles, daghang ngipon na ang nagkagot ug nagpaabot nga mahatagan niya’g katin-awan ang mga nanggawas nga akusasyon nga iyang gimaniobra ang kuwarta sa atong gobiyerno pinaagi sa pagtukod og mga bogus o bakak nga mga NGO. Nagpaabot ‘ta sa panahon nga moatubang siya sa senado aron pagbutyag sa iyang mga nahibaw-an. Daw naibtan ‘ta sa tunok dihang nasikop na si Napoles. Sa atong huna-huna, niabot na ang panahon sa pagpanudya. Mas ‘tang naghinam-hinam nga atong nakit-an si Napoles nga niatubang sa senado.

Apan daw nalukapa ‘ta sa tumang kasubo dihang wa’ siya’y laing gibutyag sa senado gawas sa pagtabon sa iyang mga nahibaw-an. Salamat sa espiritu sa Semana Santa ug niadtong Lunes santo atong nahibaw-an nga ningkanta na si Janet Napoles atubangan ni Justice Secretary Leila De Lima ug iyang gisuwat ang panga’n sa mga tawo nga nakakuwarta sa giigong PDAF.

Ug karon, nalawgaw ning tanan dihang si kanhi senador Panfilo Lacson nagpagawas ‘sab og listahan gikan sa bana ni Napoles nga si Jaime. Gawas ni Lacson, ang Malacanang nangangkon  nga nakakita og duha ka klase sa listahan gikan kang de Lima nga gikan kang Napoles. Nagtuo ang Malacanang nga gimaniobra ning tanan tungod kay managlahi ang ubang panga’n nga nabutang sa duha ka listahan ni Napoles.

Usa lang ang tataw sa pagkakaron, nahimo ‘tang alaot ning sugilanon sa listahan sa mga panga’n sa mga magbabalaud ug mga opisyal sa gobyerno nga nalambigit sa isyu. Alaot ‘ta tungod kay daw gilawgaw ning tanan aron sa pagpatuo nato nga sa katapusan wa’y angay nga tuhoan ining mga listahan nga manggawas tungod kay karon pa lang daan, kwestyonable na ang integridad sa maong listahan.

Kita ang nabutang sa dakong alanganin tungod kay gilubog sa mga opisyal sa gobyerno ang integridad unta sa maong listahan. Ug si Janet Napoles posibleng nakatawa lang ining mga sitwasyon karon. Mura ‘ta og mga iro nga nag-ilog sa bukog. Apan sa kauwahian, posibleng duwaan nga bukog ra diay ang atong giilugan.

Tunga-tunga sa atong tinguha nga matugkad ang kamatuoran sa mga pasangil ug masilotan ang mga tawo nga mapamatud-ang nikawkaw sa atong salapi, mogawas nga nagbukas ‘ta og mas dakong pultahan aron malutsan ‘ta ining mga tawhana. Ug tungod kay naa ‘ta ubos sa magic ni Napoles, moabot ang adlaw nga wa’ gyud nuoy masilotan ining tanan tungod kay mas dakong bulilyaso na ang gisugdan karon sa mga opisyal sa gobiyerno.

Daghan ang nabalaka nga moabot ang panahon nga mas mograbe pa ang pag-abuso ni Napoles tungod kay masud sa iyang alimpatakan nga siya ang naghupot sa alas ug tinuod nga sugilanon ining tanan. Kung mag-agad ‘ta sa daan nang namakak nga tawo, unsa pay atong mapupo nga kamatuoran sa kauwahian? Manguros na lang ‘tang daan ining nahitabo sa listahan.

Kung karon paspas nga nakadepensa ang mga gipanganlan uban sa ilang mga nagkadaiyang bersyon sa sugilanon pagpanalipod sa ilang tagsa-tagsang reputasyon, motuo pa kaha ‘ta kung hingpit nang ipagawas ni De Lima ang listahan ni Napoles nga gihuptan niya? O magduda pa ‘tag samot nga basin nalaslasan na sa Malacanang ang maong lista? Lisud na kung sa katapusan—kita magpalingla.

* * *

Email: [email protected]. or [email protected].