LTO wala na’y dakop

Karon nasayod na ako kun ngano nga wala na’y gihimo nga operation ang Land Transportation Office (LTO)-7 batok sa mga badlongon ug abusado nga mga drayber.

Nagpakisusi ko ug akong nahibaw-an nga adunay kamandoan si LTO Chief Alfonso Tan Jr. nga pulos na regular nga empleyado sa LTO ang idistino sa law enforcement.

Naa diha ang problema kay si LTO-7 Officer-in-Charge (OIC) Arnel Tancinco wala pa makadistino og mga regular nga kawani sa operations branch aron manakop sa mga drayber nga badlongon.

Giunsa man usab ni Tan sa paghuna-huna nga ipatuman niya kini nga plano apan wala niya lantawa daan ang epekto? Nahisama karon si Tan nga dili maayo nga manager.

Si Tan usab maoy nagpahunong sa operasyon sa tanang deputized agents sa tibuok nasud nga sakop lang og mga Non-Government Organizations (NGO).

Usa ang Task Force Alpha (TFA) nga naapektahan. Ako’ng klarohon, dili ra kay ang TFA maoy nahunong sa pagpanakop kun dili ang tanan gayud nga mga civilian deputized agents nga dili konektado sa kagamhanan.

Bisan gani kun konektado sa kagamhanan apan dili permanent ang ilang appointments, wala na tuguti nga manakop. Maayo man usab ang tumong ni Tan apan ang nakasayop lang kay wala niya daan tan-awa ang epekto.

Tan-awa karon, napasagdan na lang ang mga badlongon ug abusado nga mga drayber nga wala na’y nanakop? Mag-unsa man kanang mga sakop sa CITOM, mga sakop sa TEAM ug unsa pa kana’ng uban diha nga wala man kana’y klaro manakop.  Tutokan ra man nila bisan anaay klaro kaayo nga dakponon. Nakakita ko og sakop sa CITOM kaniadtong Lunes sa hapon nga nagpasalipod didto sa eskena Sanciangko ug Leon Kilat.

Sa pamaagi ni Tan, dili na tugutan nga mahimo’ng deputized agents sa LTO kadtong mga sakop sa CITOM nga dili regular ang appointment.   Unya karon, tug-ani ko ninyo kun kinsa diha sa CITOM ang regular ang appointment? Kamo’ng mga sakop sa media nga nag-cover diha sa LTO, hala, pangutan-a ninyo si LTO Chief Tan niini nga problema sa iyang pag-anhi sa Sugbo karong Biyernes.

Usbon nako, gituman g’yud ni Tan ang balaod ilabi na nga usa man siya ka abogado, apan wala niya tan-awa ang epekto sa iyang kamandoan kay nahunong man hinoon ang operation sa LTO.

Ang nagkatawa karon mao ang mga drayber nga abusado ug mga badlongon kay sa ako na nga giingon wala man sila mahadlok sa mga traffic enforcers nga manakop lang og mga drayber kun “buwanon.”