Turismo sa Coron

Coron, Palawan — Nakadalikyat ko og bakasyon su’d sa upat ka adlaw ning usa sa labing gidugok nga lugar sa nasud karon sa mga turista. Ang lungsod sa Coron nipasigarbo sa iyang nindot nga mga isla ug nindot nga mga atraksyon. Wa’ ko magmahay tungod kay mas pang nindot sa akong gipanlantaw ang akong naabtan ning maong dapit.

Sa tanang lugar sa Pilipinas, sakto ang pangangkon sa lalawigan sa Palawan nga sila na lang ang nagpabiling napreserbar ug wa’ matandog sa industriyalisasyon. Ang maong dapit ang nagpamatuod nga di’ imposibleng mapanalipdan ang atong kalikupan likod sa kampanya sa turismo. Ang Coron ang first class municipality sa lalawigan sa Palawan.

Adunay di’ momenos sa 50 ka mga gagmay nga isla ang lungsod nga napuno sa nindot nga mga beach ug mga lagoons. Sa halos 50 mil ka mga tawo nga nagpuyo sa kinatibuk-ang lungsod sa Coron, ang maong dapit ang gitawag ‘sab nga Calamian archipelago. Ang pagpanagat ang nag-unang panginabuhian sa maong dapit. Aduna say uban nagsalig sa minahan.

Apan salamat sa pagsu’d sa turismo, karon mas daghang tawo ang nagsalig sa turismo isip ilang nag-unang sandigan sa panginabuhian. Abunda sa kasaysayan ang maong dapit. Atol sa ikaduhang gubat sa kalibutan, adunay mga Japanese warship nga nalunod sa Coron. Karon, nakatabang ang maong mga barko tungod kay kini na ang labing dugukon sa mga isda nga maoy kinaham nga destinasyon sa mga diver.

Gani ang Forbes magazine ning bag-o, nihanga’n sa Coron isip usa sa napu’ ka nindot nga diving site sa kalibutan. Karon sentro sa atraksyon sa dapit ang mga nindot nga beach, mga lagoon ug diving site. Kini lang ang dapit nga akong naduaw nga makigduwa ang isda nimo sa imo pa lang pagtaak sa dagat. Pinaagi sa mga budget airline nga naa nato karon, mas makabarato ka sa imong bakasyon basta sayo lang planohon.

Tungod kay aduna nay direktang flight gikan sa Cebu paingon sa Busuanga, usa ka isla nga sakop sa maong lungsod, mas sayon na lang sa mga taga Cebu ang pagduaw sa maong dapit. Mas maayo nga mobiyahe sa Coron nga grupo o daghan mo aron nga mas makabarato sa gasto. Sa budget nga P1,500 matag kuwarto alang sa duha ka tawo, mahimo ka nang makapuyo sa nindot ug limpyo nga puy-anan sa lungsod mismo sa Coron.

Tungod kay nahibawo ang mga tawo sa ka mahinungdanon sa turismo sa ilang ekonomiya, silang tanan nahibawo na unsaon sa pag-atiman sa ilang bisita. Adunay gitanyag nga mga package tour sa island hopping diha pa lang sa mga hotel nga imong puy-an. Apan kung praktikal ka nga turista sama nako, mas maayong mangita og paagi nga makabarato.

Kuha og pumpboat nga direktang moserbisyo nimo sa island hopping ug ayaw na pag-agi og travel agency. Kung direkta ka sa tag-iya sa pumpboat, mahimo kang makahangyo. Sa among unang adlaw sa Coron, dos mil pesos lang ang gipangayo sa pumpboat alang sa dose oras nga serbisyo. Niabot sa unom ka lugar ang among giduaw lakip na ang puti ug pino nga bas sa mga beaches ug ang bugnaw nga tubig sa mga lagoon. Inay mokuha og tour package, kung mahimo ikaw na ang mangompra sa inyong pagkaon  sa ila mismong merkado. Makapili ka sa mga klase-klaseng isda ug seafood nga imong gusto.

Labaw sa tanan, makahangyo ka pa. Barato lang ang kilo sa isda nga mokabat sa 50 pesos hangtud sa 160pesos ang kilo. Ang akong paboritong pakul anaa sa 50 pesos ang kilo.

Samtang ang mahalon nga Lapu-Lapu nga bulawan ang presyo sa Sugbo mokabat lang sa 160 pesos ang kilo. Sa among usa ka adlaw nga tour ug island hopping lakip na ang pagkaon, nigasto lang ang matag usa sa among walo ka maghigala og P540. Dakong hagit alang sa matag usa ang pagsigurong andam ang tanan sa turismo.

Kung nahimo sa Coron nga isilsil sa alimpatakan sa mga tawo unsa ka mahinungdanon ang mga turista ug unsa ang epekto nila sa lokal nga ekonomiya, pagkanindot kaha sa nasud nato kansang mga atraksyon sama sa mga beach ug diving area, di’ mabintahaan sa uban.

Emai: [email protected] or [email protected]