EDITORYAL - Police revamp wala’y kapuslanan

Sagad sa mga polis gusto nga anha ra sila madistino sa tagsa-tagsa nila ka lugar aron duol ra sila sa ilang pamilya.

Kini maoy angay’ng gamiton sa kadagkoan sa kapolisan nga hinagiban aron pugson ang mga polis nga motrabaho pagsumpo sa ilegal nga kalihukan sa dapit nga sila nadistino.

Kay gusto man g’yud sa mga polis nga maduol sila kanunay sa ilang pamilya, kinahanglan nga molihok sila aron dili balhinon pagdistino sa layo nga lugar.

Kadto’ng mga opisyal ug sakop sa kapolisan nga dili makasumpo sa ilegal nga kalihukan sa tagsa-tagsa nila ka dapit ibalhin pagdistino adto sa lagyo nga lugar isip silot.

Pinaagi niini nga sistima, dako ang posibilidad nga molihok na g’yud ang mga opisyal sa kapolisan paghimo’g tinud-anay nga kampanya batok sa ilegal nga kalihukan sa ilang teritoryo.

Kinsa man gud ang mahadlok sa sistema karon sa kapolisan? Hulipan ka man tuod sa imong pwesto apan iniglabay sa pipila ka adlaw gibalhin ra ‘sab diay sa lain nga police station nga dia ra usab gihapon sa dakbayan.

Susama ra nga ang katawhan lang ang gibinuangan. Ang polis nga walay maayo’ng lihok sa pikas police station gibalhin ra usab sa duol. Ikaw, mahadlok ka ana?

Apan kun balhinon sila pagdistino sa Mindanao o bisan sa ubang dapit sa Central Visayas, tingali mahadlok na niini ang mga opisyal ug makaagni kini kanila nga motrabaho pag-ayo batok sa mibalik na nga operation sa video karera, masiao ug ilegal nga drugas.