Naghitak nga krimen

Mokabat sa 11 ka   police station chief sa dakbayan sa Sugbo ang gipailalum karon sa usa ka lahugay sa  kadagkoan sa Cebu City Police Office. Kini nunot sa taho sa pagsaka sa krimen sa dakbayan. Wala na siguro makauyon ang liderato sa CCPO ning maong kalamboan. Bisan pa sa gihingusgan nga kampanya batok sa kriminalidad, padayong misulbong ang krimen ning dakbayan.   

Mao nga ang mga hepe sa 11 ka police station igo gayud sa revamp. Gani si Fuente Police Station chief David Señor ug Guadalupe Police Station chief Allan Rosario nagbayloay na sa ilang mga puwesto isip kabahin sa maong lahugay.

Una nang gipasidan-an ni Mayor Michael Rama ang kapolisan nga kinahanglan hingusgan nila ang kampanya batok sa kriminalidad. Kay kun pakyas sila, aw mamutos na lamang sila daan kay klarong lagpot gawas sa dakbayan ang ilang dangatan.

Bitaw. Kun dili kaya sa mga hepe sa kapolisan ning dakbayan ang pagsumpo sa mga kriminal, maayo pang mamutos na lamang silang daan. Wala nato gikinahanglan ang ingon niining mga klase sa opisyal. Hinuon isip usa ka highly-urbanized city, dili nato malikayan nga motumaw gayud ang mga nagkalain-laing krimen ning dakbayan. Ug dakong hagit sa atong kapolisan ang pagsumpo niining mga badlongon sa katilingban.

Niining pagsaka sa mga krimen, ang imahe sa dakbayan ang klarong mabuthan. Basin daghan unya ang moyam-id sa dakbayan tungod sa nagkagusbat nga kondisyon sa kahusay ug kalinaw niini.

Angay lamang nga pakusgan pa sa atong kapolisan ang ilang kampanya batok sa kriminalidad. Kinahanglan nga ilang seryosohon ang pagsilhig niadtong mga bugok sa katilingban.

Husto ang giingon ni Rama nga ang CCPO kinahanglan nga motinuod sa trabaho niini, ilabina nga adunay kalihokan sa Asia-Pacific Economic Cooperation ug ang International Eucharistic Congress nga ipahigayon dinhi. Ug kun padayon nga maghitak ang krimen sa dakbayan, dili kaha magduha-duha ang mga organizer sa maong mga internasyonal nga kalihokan? Dako gayud kini nga kaulawon sa kagamhanan sa dakbayan. Siyempre, dako gayud ang paglaum sa mga Sugboanon nga magmadaugon ang otoridad sa kampanya batok niining nagkadakong hulga sa kahusay ug kalinaw.