Panagkuyog

Kun atong langkubon ang kinaiya ug dagway sa maayong magbalantay, kini atong mabutang diha sa atong pagsabot sa panaw sa kinabuhi ingon nga panaw sa panagkuyog.  Ang magbalantay sa mga karnero, mokuyog ug mouban sa iyang panon aron makakita sila og masibsib. Butang nga kinahanglanon kaayo nila aron sila mabuhi. Ang maong panagkuyog   niresulta sa panag-ilhanay tali sa Magbalantay ug sa iyang mga Karnero.

 Kini usab ang dagway sa atong relasyon uban sa atong Ginoo ingon man sa iyang mga sinugo. Ning Domingo sa Katilingbanong Pag-Ampo alang sa mga Bokasyon, padayon natong i-ampo ang atong  kaparian ug mga relihiyuso nga ang ilang kinabuhi, kinabuhi sa pakig-uban sa ilang panon. Lisud man tuod kining buhaton apan wala kini magpasabot og usa ka impossibility. Uban niini ang maampoong pagtahan ngadto sa kabubut-on ni Kristo ang atong Labaw’ng Magbalantay.

Sa laing bahin, ato usab pasidunggan ang atong mga Inahan ning pagsaulog nato sa Mother’s Day. Sa ilang kaugalingon, nahimo pud silang mga Magbalantay alang kanato. Sila ang atong mga giya ug gani ang atong mga unang mag-uumol diha sa panimalay ingon nga luyonganan sa mga unang binhi sa Bokasyon.