Sekretong sabot ni Napoles

Tulukibon ang kalit nga paglikoy sa pamunoan ni Presidente Noynoy Aquino sa kaso ni Janet Lim Napoles, ang gipasanginlang utok sa P10 bilyones nga pork barrel scandal. Human sa kahigpit sa seguridad nga gipahamtang sa pagtanggong ni Napoles sa Fort Sto. Domingo sa Laguna, nikalit paglubay ang gobyerno sa paglugway sa pagpabilin ni Napoles sa Ospital ng Makati (OsMak).

Kini bisan nabisto nga di diay seryuso ang operasyon pagkuha sa tumor sa iyang tagoangkan. Kini bisan gihatagan na siya sa mga doktor ug pagtugot nga makagawas sa ospital. Kini bisan gitataw na sa OsMak nga makagawas siya bisan wa pa kaimpas sa dul-an sa P100 mil nga bayranan.

* * *

Nakapasamot sa pagduda sa publiko nga may tinagoang sabot ang gobyerno ug ang kampo ni Napoles ang taphaw nga reaksiyon sa Malakanyang dihang gipangutana sa mga sakop sa media sa kalangay sa pagpabalik ni Napoles sa iyang prisohan. Igo lang nitubag si Communications Secretary Herminio Coloma nga di na sila manginlabot kanus-a pagawason sa ospital si Napoles.

Siyaro kun way nakahunghong ni Coloma nga dunay Hospital Detention Law nga nagdili pagtanggong sa pasyente nga di makabayad. Kun wa pay konsabo, nangisog untang Malakanyang nga pabalikon sa labing daling panahon si Napoles sa Fort Sto. Domingo. Nisamot kabakikaw ang palasyo dihang nitataw ang OsMak nga wa sila mangambisyon pagtanggong ni Napoles.

* * *

Labing naapiki sa nag-ung-ong nga areglo sa gobyerno ug ni Napoles mao si Justice Secretary Leila de Lima. Kinsa dako tingali og pagmahay nga nisugot nga maoy kumpisalan ni Napoles. Di siya pari, ni abogada ni Napoles, apan gipili ni de Lima ang pagtipig sa kasayuran nga gihatag ni Napoles niya.

Maong ang kontrobersiyal nga lista ni Napoles nahimo na sang lista ni de Lima. Tungod sa pagpasalig nga iyang susihon ang mga sukaranan sa listahan, gipahamtang ni de Lima sa iyang kaugalingon ang nangalisbo nga responsibilidad sa pagsusi may nahibilin pa bang bisan gamay na lang nga lama sa kaligdong si Napoles.

* * *

Si de Lima nasuhito sa papel ni Napoles sa mga transaksiyon pagpasimang sa P10 bilyones nga buhis ngadto sa pribadong mga bolsa. Siya’y labing nahibawo giunsa paggamit ni Napoles ang koneksiyon sa mga opisyal sa gobyerno sa iyang palusot.

Ambot tungod ba sa sibaw’ng awhag pagpasaylo sa Semana Santa, giduaw ni de Lima si Napoles sa OsMak dayong tungang gabii niadtong Lunes sa pagkabanhaw. Naabtan siya og lima ka oras pagpaminaw sa istorya ni Napoles. Nawad-an hinuon og bili ang tahas ni de Lima pagsusi nagsulti ba sa tinuod o nangangin lang si Napoles tungod sa deklarasyon ni Ombudsman Conchita Carpio Morales nga wa kinahanglanang pagbalitok ni Napoles aron makonbikto ang mga sinumbong sa eskandalo.

* **

[email protected]