EDITORYAL - Solo Parent Ordinance

 Gipasar na ang Solo Parent’s Ordinance sa Konseho sa siyudad sa Sugbo niadtong Miyerkules  nga nagtinguha nga hatagan og tag singko mil pesos nga financial assistance ang mga babaye o mga lalaking nag-inusarang nagbuhi sa ilang mga anak.

Dili ikalimod nga maayo kini og tumong kay alang man kini sa mga anak niadtong mga nawad-an o ba kaha gibiyaan sa mga iresponsable nilang mga pares.

Apan dunay mga konsehal sama nilang Mary Ann De Los Santos nga may pagukon-ukon sa maong ordinansa kay basin maabusaran lang kini. Butang nga gipakagamay lang sa nangamahan sa ordinansa nga si Konsehal Gerardo Carillo kinsa miingon bukas kaayo ang maong ordinansa alang sa mga kausaban kun gikinahanglan.

Di ikalimod nga dunay nangabusar sa pagsugod pa lang sa pagpanghatag og financial assistance ngadto sa mga senior citizens kay dunay mga taga lagyong lugar gawas sa Cebu City nga tuyo gyung namalhin og puyo dinhi aron maka-avail sa maong benepisyo.

Ang gikabalak-ang pag-abusar unya sa ordinansa,  gamay lang kaayo kini kun itandi sa epekto niini ngadto sa mga single parent  nga  gikan sa sinugdanan nagsalig lang gyud sa ilang mga ginikanan ug wala na gani maningkamot para sa kaugmaon sa ilang mga anak.

Pila ba gyud ka buok ang rehistradong mga single parents karon sa siyudad? Ug pila pa kaha ang dugay na nga single parent apan wala pa makaparehistro?  Sigurado nga   daghan ang mga solo parents ug mogawas lang ni sila pagsugod na sa pagpanghatag sa mga ayuda.

Pipila niining mga single parent nagpuyo uban sa ilang mga ginikanan, mga ginikanan nga posibleng nagdawatan usab og financial assistance sa siyudad ug malagmit benepisyaryo usab sa  4Ps sa nasudnong kagamhanan.

Wa na bay laing alternatibong paagi aron matabangan kining maong sektor gawas sa paghatag kanila og di hinagoang kwarta?