Hangyo ni El Tabaco

Si Presidente Fidel Ramos, ang nailang si El Tabaco, miawhag sa mga sakop sa media sa pagtan-aw usab sa mga nabuhat ni Presidente Noynoy Aquino tungod kay matud niya nga dili lalim ang pagka-presidente sa Pilipinas.

Ang pulong nga gigamit ni Ramos mao ang “appreciate.” Matud niya ngadto sa mga sakop sa media nga maayong i-appreciate usab sa mga sakop sa media ang mga nahimo ni Noynoy sa iyang pagdala sa renda sa pangagamhanan.

Sakto si El Tabaco.

Buta ra usab ang mga sakop sa media sa mga paninguha ug tinguha ni Noynoy. Nga sa iyang pagpamuno sukad siya napili isip presidente niadtong 2010 sa kinabag-ang Pilipino human mamatay sa kanser ang iyang inahang si kanhi presidente Cory Aquino, aduna siya’y mga reporma nga nahimo.

Apan dili na kinahanglang i-appreciate pa sa media o sa kinabag-ang Pilipino ang gipamuhat ni Noynoy. Iyang trabaho isip presidente sa Pilipinas ang pagreporma sa mga hiwi nga palisiya sa gisundan niyang administrasyon.

Tinuod nga wala sa iyang pahak ang pagplano nga modagan pagka-presidente. Kay unsa ba guy nahimo niya sa dihang siya pa ang kongresista sa lugar sa ilang katubhan nga gikagubtan sa mga benepisyaryo sa yutang gi-agrarian? Unsa may ikapanghambog niyang performance sa dihang nahimo siyang senador?

Apan dili mapugos ni El Tabaco ang mga Pilipino sa paghikalimot na lang sa mga kahiwian bugti sa pagtan-aw unsay mga reporma nga nahimo sa administrasyon ni Noynoy. Ang mga Pilipino gipakatawo nga duha ang dunggan ug duha ang mata. Dili mahimong sap-ongan ang usa kun makit-an ang binuang ug kahiwian nga makadaot sa kinabag-an.

Dili mahimong magpakabuta-bungol na lang ang mga tawo, samot na kaming mga sakop sa media.

Sa pagkalagpot sa pamilyang Marcos sa Malacañang, nalipay ang mga Pilipino tungod kay nakalingkawas na kita sa tumang kahagip-ot nga pagpuyo nga wala na lay kagawasan tungod sa martial law.

Sa paglingkod ni Cory Aquino, ang usa ka plain housewife nga napiling presidente pinaagi sa rebolusyon, gigukod ang pamilyang Marcos aron mauli ang gipangawat gikan sa katawhan. Apan bisan tua na ang diktador nga si Ferdinand Marcos ug pamilya niini didto sa Malacañang, nagpabilin ang iyang mga “crony” nga sa mga misunod nga mga administrasyon nakasakay, napili sa eleksiyon ug natudlo sa mga sensitibong posisyon sa mga ahensiya sa kagamhanan.

Sa pamunoan ni Cory hayahay na unta ang mga Pilipino tungod kay nahimo na silang gawasnon ug nahatagan pa og Konstitusyon nga maka-tawo. Apan taliwala niini, ang oligarkiya kon mga dagko ug adunahang pamilya naghinayhinay sa pagsulbong pinaagi sa pagpanag-iya og mga dagkong kompaniya sa mga produktong kunsomo sa katawhan, tubig, kuryente, transportasyon ug komunikasyon.

Gawas pa niini, ang pamilyang Cojuangco nanghawod sa bisan unsang aspeto. Mao nga natawo ang giingong “kamag-anak” nga gobyerno. Mao nga silang Col. Gringo Honasan ug anhing Col. Billy Bibit mialsa ug ang ilang grupo nga RAM miatake sa Malacañang niadtong 1989.

Human ni Cory milingkod si El Tabaco. Mimis ang pamaagi sa kinawatay. Apan ang hilig ni El Tabaco mao ang “privatization” diin daghang mga korporasyon nga iya sa gobiyerno ang gipamaligya sa mga oligarkiya. Unsay nahitabo sa kapanag-iyahan sa gobiyerno sa San Miguel Corp., Petron, Napocor, ug uban pa?

Napulihan si El Tabaco ni Erap Estrada nga karon nag-mayor na lang sa Manila. Apan kining presidenteha ang malampuson nga nakagamit sa puwersa sa masa. Ang bagang duot sa mga pordoy’ng katawhan ang mi-itsa ni Estrada ngadto sa Malacañang pinaagi sa iyang battlecry nga “Erap para sa Mahirap.” Apan ang kalisod misulbong, wala niya masulbad. Ang hilig ni Estrada dili deretsoderetso nga kawat sa kuwarta sa mga tawo. Kay ang iya mao ang ilegal nga sugal diin siya nalipay sa minilyon nga “kickback” nga mao usab ang mipatid niya paingon sa prisohan tungod sa kasong plunder. Napriso, apan wala ma-impeach.

Iyang hepe sa PNP nga si Ping Lacson, nga karon sakop sa administrasyong Aquino isip rehab czar, maoy iyang bastonero sa mga mosukol sa iyang gobiyerno. Mao kadto ang mga panahon nga namatay ang PR man nga si Bubby Dacer ug iyang drayber nga si Corbito, apan human na mahitabo ang Kuratong Baleleng rubout.

Napalagpot si Estrada ug gipulihan sa iyang vice president nga si Gloria Arroyo nga milahos pagka-presidente hangtod sa 2010. Gawas sa kinawatay sa kaban, ang bana ni Arroyo ang gipasanginlang nagdala sa puntil ug maoy misulod sa mga binuang gikan sa smuggling sa customs paingon sa pag-broker og dagkong negosyo gikan sa China aron makabulsa og binilyon nga kickback.

Apan dinhi sa administrasyon ni Noynoy nalili-an ang laksot nga pamaagi – direktang kinawatay sa kuwarta sa gobiyerno pinaagi sa pagwariwari sa Priority Development Assistant Fund alang sa mga senador ug mga kongresista, nga ang giingong utok mao ang budget secretary ni Noynoy nga si Butch Abad. Dinhi niining gobiyernoha nasakpan nga ang mga alyado sa presidente mao ra usab ang nalambigit niining pork barrel scam, samtang ang mga ahensiya nga gitahasan nga mopasaka og kaso nahimong bisi sa pagpangita og pamaagi nga makalusot ang ilang kauban.

Sukad ni Marcos hangtod ni Noynoy, wala’y puas ang pagbantay sa mga tawo ug nag-antos pagpaminaw ug pagtan-aw sa mga binuang.

Hangtod kanus-a kaha ang atong pag-antos?