Mayo Uno, may biyaya?

Dapat ay masaya ngayong Mayo Uno

Mga manggagawang banal sa trabaho;

Pero balewala sa ating gobyerno

Sa maraming sector ay walang umento!

Ang sundalo’t pulis, marines at abyador

Mga nasa media, writers at editors

Hinihintay nila’y dagdag na pasahod

Waring bigo sila sa anumang bonus!

Pero papaanong lalaki ang sweldo

Inubos ng Congress pera ng gobyerno;

Pati si Napoles kahalo sa gulo

Kaya ang kawawa ay mga obrero!

Sa araw at gabi’y tuloy sa gawain

Mga manggagawa’y hindi tumitigil;

Mababa’t mataas kanilang tungkulin

Maglingkod ng tapat upang may makain!

Mga pulitiko na nasa Batasan

Kahit nililitis ang pera’y dagsaan;

Kung saan napunta salapi ng bayan

Walang umaamin dahil tampalasan!

Ang mga mapera’y hindi nagbibigay

Sa mga obrerong kayod araw-araw;

Mga pulitiko’y walang pakialam

Ang tanging layunin ay muling mahalal!

Kaya ang umento na hintay nang lahat

Ay hindi darating ang bansa ay salat;

Ngayong Mayo Uno ang obrero’y dilat

Pagka’t ang biyaya malayo sa palad!