Karsada lang gihapon

Karon nasabtan na g’yud nako. Ang pag-aspalto sa karsada nga gihimo sa Ven Ray Construction kaduha nila gihimo. Ang una nga pag-aspalto, lubak-lubak pa og gamay, apan diha nga giusban nila pag-aspalto, sinaw na kaayo ang karsada.

Ang kontrata pag-aspalto sa Gorordo Avenue nagkantidad og P33.9 milyones ug nakuha kini sa Ven Ray Construction.

Kay kanunay man ko nga mag-agian diha sa Gorordo Avenue ug Veterans Drive sa Barangay Busay, makakita g’yud ko kun unsa ang kalamboan sa ilang asphalting project.

Kun makakita ko og daghang dump truck nga maglumbay na daplin sa Gorordo Avenue mga alas utso sa gabii, malipay na ko kay nagpasabot kini nga mang-aspalto na usab sila sa karsada.

Gitandi nako ang kontraktor sa asphalting project sa Gorordo Avenue ug sa kontraktor sa Veterans Drive, kana’ng karsada patungas sa Barangay Busay. Arang-arang og gamay ang Ven Ray Construction kay sa kontraktor sa pag-aspalto sa Veterans Drive nga mobiya og proyekto nga dili dayon humanon.

Ambot ug unsa kini nga construction company nga nagpabaya lang sa ilang katungdanan. Unsaon, kini’ng mga opisyal sa Department of Public Works and Highways (DPWH) wala man lang magpakabana.

Ang angay unta nila nga gihimo mao ang pagputol na sa kontrata ngadto sa mao nga kontraktor nga nakapahasol kaayo sa mga tawo. Kana’ng tungasan nga bahin gikan sa bag-ong Lahug Market paingon sa Marco Polo Hotel, mga hapit na usa ka buwan nga gibiyaan human nila gikaskas.

Tarong ba gud na nga pagka kontraktor nga giguba ra nila ang karsada dayon gibiyaan? Unya kini’ng mga opisyal sa DPWH nga gitugyanan pagsuperbisar sa proyekto wala g’yud mokihol, ngano kaha?

Kadudahan kaayo ang ilang pagpakahilom. Ngano nga magpatuga-tuga man pagsulod og kontrata alang sa asphalting project kini'ng mao nga kontraktor nga wala man kaha sila'y  kapasidad paghuman dayon?

Kamo 'sab nga mga sakop sa Bids and Awards Committee (BAC) sa DPWH, ngano nga didto man usab ninyo gi-award ang maong project niini nga kontraktor nga dili maayo motrabaho?

Nahisama ko sa “plaka nga guba” nga nagsigi og balik-balik niini nga problema kay unsaon, pating kaayo’g ulo kini’ng kontraktor sa asphalting project diha sa Veterans Drive. Pwerte ra ba g’yud nga bati’g agi. Aw, ambot, basin og “first coating” pa kini’ng ilang gihimo diha sa Veterans Drive. Apan siyaro na man ‘sab, kanus-a pa man nila kini humana?

Ang gikuyawan nako nga tingali’g moabot ang higayon nga i-turn over na lang kini nga proyekto ngadto sa DPWH ug ingnon nga kompleto na unya pirmahan lang ‘sab sa mga opisyal sa DPWH.

Kanus-a pa intawon madutlan og kauwaw kini’ng mga tawhana.