EDITORYAL - US molaban?

Natubag ang mga pangutana sa mga Filipino nga dugay nang nagbitay sa kahanginan kun molaban ba ang Amerika sa Pilipinas kun magka-giyera ang Pilipinas ug China.

"The Philippines will not stand alone" mao kini ang mensahe ni US President Barack Obama atol sa iyang duha ka adlaw nga state visit sa Pilipinas.

Kung susihon og maayo, ang unod sa iyang pamahayag, walay bag-o niini tungod kay anaa na kining daan nalatid sa Mutual Defense Treaty 60 ka tuig na ang milabay. 

Ang Amerika ug Pilipinas magtinabangay kung dunay pag-atake sa mga teritoryo sa duha ka nasud gikan sa external threats.

Apan wala malakip sa kasabotan ang 'contested territories' nga gikasungian karon sa Pilipinas ug China ingon man sa pipila ka mga nasud sa Southeast Asia diha sa West Philippine Sea.

Daghan ang wa masayod sa mga Filipino nga bisan wala pay kasabotan ang Amerika ug Pilipinas, kung ilogon ug kontrolon gyud sa China ang West Philippine Sea makiggubat gyud niini ang Amerika.

Kini tungod kay kaalyado niini ang Japan ug South Korea nga nagsalig usab sa WPS nga rota sa pagpadagan sa ekonomiya niining duha ka mga nasud.

Magpasalamat na lang ang Pilipinas nga dunay interes ang Amerika sa WPS tungod kay mamahimo niining bonus ang aksyon sa US kung dunay himuong dili mao ang China. Buot sa Amerika nga bukas isip "international waters" ang WPS.

Dako ang importansya sa WPS alang sa Amerika, tungod sa economic ug strategic values aron pugngan ang paglighot sa China.

Sa laktod pagkaestorya, ilusyon lang nga labanan kita sa Amerika kun ilogon ang Pagasa Island ug uban pang mga isla sa Pilipinas sa WPS.