EDITORYAL - Kampanya batok makililimos atik ra

Tangkod na nga 36 ka tuig ang milabay human gihimo ang balaod nga mosilot sa mga tawo nga magpakilimos bisan og ang ilang lawas baskog pa unta kaayo aron makatrabaho apan ang gipasuwabi nila mao ang pagkatapolan.

Ang Presidential Decree 1563 nga gimugna kaniadtong 1978 mosilot usab sa mga tawo nga mohatag og limos. Mao kini ang rason nga kadtong gusto nga magpakilimos, mangayo sila og permit sa Department of Social Welfare and Development.

Apan bisan pa sa paghimo og mga ordinansa sa lainlaing Local Government Units, apil ang dakbayan sa Sugbo, nga nagsuporta sa mao nga balaod pabiling palpak ang kampanya batok sa mga makililimos.

Dinhi sa dakbayan sa Sugbo, daghan gihapon nga mga makililimos nga abtik pa kaayo’g lawas nga mangayo’g limos sa mga motorista. Inig-duol hinoon niini’ng mao mga tawo sa motorista nga ilang pangayoan magpaluya-luya sila aron ingnon nga masakiton.

Usa niini kini’ng Badjao nga anaa kanunay magpakilimos sa eskena Gorordo ug General Maxilom Avenue atubangan sa usa ka tunghaan.

Duol mismo sa rehiyonal nga buhatan sa DSWD sa eskena M.J. Cuenco ug General Maxilom Avenue mas daghan ang makililimos nga anaa diha.

Unsa ma’y gihimo sa Cebu City Task Force Mendicancy nga gidumala ni Betty Ganub? Dili ba angay’ng ikauwaw nga mangangkon lang ta nga nakatuman sa tahas nga gisangon sa task force apan ang tinuod kutob ra sa pulong?