Ang pagpananom

Sa balita nananom ang 30 ka empleyado sa Apo Cement Corp. ug ang 100 ka tinun-an sa St. Martin de Porres Academy sa Daanbantayan og 3,000 ka  bakhaw sa baybayon sa Daanbantayan, Cebu. Kini agi og pag ingganyo sa katawhan sa pagpanalipod sa mga bakhawan aron adunay makapanalipod dili lamang batok sa storm  surges o pagtaas sa tubig ug dagkong mga bawod kun dili aron aduna usay makapugong sa pagdahili sa   kabaybayonan, magsilbing itloganan sa mga isda ug ubang mga nagpuyo sa dagat ug aron magsilbi usab kining panagang sa global warming o pag-init sa kalibotan matud pa ni Jenevy Patalinghod ang environment officer sa Apo Cement Corporation.

Ang kalihokan gipahigayon sa Municipal Environment and Natural Resources Office sa Daanbantayan, Cebu nga gipangulohan ni Arturo Sagrado.

Akong gihangop ang pagpananom og bakhaw sa nahisgotang kompanya tungod kay kun mabuhi lamang ang tulo ka libo ka  bakhaw dako na kaayo kini og ikatabang sa atong kalikopan ug makapanalipod na usab kini sa katawhan gikan sa katalagman. Ang ako lang nga nabalak-an kun balikon pa ba kaha intawon sa mga nagtanom ang bakhaw nga ilang gitanom sa Daanbantayan?

Sigun gud sa akong nabantayan daghan nang programa sa mga pagpananom og kahoy ingon man bakhaw ang gipasiugdahan sa mga nagkalainlaing grupo nga nagpakabana apan daw sa wala na sila masayod og unsa nay nahitabo sa ilang gipananom paglabay na sa panahon kay sa pagpananom igo ra sila sa kasibot apan sa pag- atiman dali ra kaayo silang nalimot.

Seguro kun gibalik pa sa mga nananom og kahoy ug bakhaw ang ilang gipananom ug giatiman milasang na seguro unta pagbalik ang ilang gipangtamnan apan kay wala man maong mibalik ra gihapon sa naandan.

Sugyot nako sa mga mopasiugda og mga pagpananom og kahoy ug bakhaw, ayaw tawon ninyo kalimti ang inyong gitanom. Balika tawon ninyo ug atimana ang inyong gitanom aron dili masayang ang inyong kahago ug gasto. Hatagi ninyo og gamay nga pagpakabana ang inyong gitanom ug ayaw lang mo kutob diha sa pagpahulagway sa kahoy nga inyong gitanom.