EDITORYAL - Binuang sa mga kontraktor

Giangkon sa kadagkoan sa Department of Public Works and Highways (DPWH) nga peligro sa mga motorista, ilabi na sa mga magsakay og motorsiklo, ang pag-agi nianang gituyo pagkaskas nga bahin sa karsada.

Matud ni Engr. Lito Catubig sa DPWH Construction Division nga dili imposible nga madakin-as ang ligid sa motorsiklo nga moagi niini’ng mga gituyo pagkaskas nga karsada unya gibiyaan lang sa mga kontraktor.

Ang pagpang-aspalto sa mga karsada dinhi sa dakbayan gipatuman kini sa DPWH-7 Regional Office tungod kay naglambigit na man kini og daku kaayo nga kantidad sa proyekto.

Bisan dili kini sa DPWH-Cebu City District ang mao nga mga proyekto apan misaad si Engr. Catubig sa pagtabang nga ipadayon na sa kontraktor ang ilang proyekto.

Kun proyekto man kini sa DPWH-7 Regional Office ang mao nga pagpang-aspalto, magpasabot diay nga si Regional Director Ador Canlas maoy angayan nga basolon kay nagmika lang sa iyang katungdanan.

Imposible kun si Direktor Canlas wala makaagi niini’ng mao nga mga karsada nga gipangkaskas sa gikuha nila nga kontraktor ug gibiyaan lang sulod sa daghan na nga mga semana.

Kun pananglit nagkuwang man ang aspalto nga magamit wala unta nila dali-dalia sa pagkaskas ang karsada aron lang biyaan ug masakripisyo ang mga motorista.

Ang walay pagtagad sa mga opisyal sa DPWH sa binuang sa mga kontraktor klaro kaayo nga dili serbisyo ang ilang gilantaw, ug basin tukma ang gituohan sa uban nga komisyon ra ang ilang giapas.