Murder batok sa opisyal sa HPG Gipasakaan

Gipasakaan na og kasong murder ug frustrated murder ang mga opisyal ug sakop sa Highway Patrol Group sa rehiyon 7 human masuta sa imbestigasyon sa National Bureau of Investigation, Criminal Investigation and Detection Group, kapolisan sa lalawigan ug dakbayan sa Sugbo nga maoy naglangkob sa Task Force Archival nga aduna silay kalambigitan sa pagbanhig patay ni manlalaban Noel Archival ug sa iyang duha ka  kaubanan ug pagkaangol sa lain pa niyang kauban. Ang kaso anaa na karon  sa Cebu Provincial Prosecutor’s Office. Kagahapong adlawa  usab gipasakaan sila og kasong administratiba didto sa buhatan sa Ombudsman. 

Basi sa imbestigasyon, wala gayoy saksi nga makatudlo ngadto sa mga opisyal ug sakop sa Highway Patrol Group 7 nga sila ang naghimo sa krimin apan ang mga imbestigador positibo nga ang mga akusado mao gayod ang naghimo sa krimin gumikan sa mga circumstantial nga mga ebidensiya nga ilang nahipos.

Una, ang logbook sa security guard sa Highway Patrol Group Compound  nagpakita nga adunay upat ka  sakyanan nga gipagawas sa compound usa ka adlaw sa wala pa ang pagbanhig sa grupo ni Archival. Ang maong mga sakyanan namalik usab sa compound upat ka oras human banhigi ang grupo ni Archival. Sa pagsusi sa mga sakop sa Task Force Archival sa impounding area sa Highway Patrol Group ilang nakit-an ang puwa nga sakyanan nga mitukma sa nakuha sa CCTV nga gimontar sa dapit diin nahitabo ang krimin.

Ikaduha, sigun sa gihimong eksaminasyon sa sakyanan, nasuta nga aduna pay pulbora sa armas nga namilit sa bentana sa sakyanan ug ang bala nga  gigamit sa pagbanhig sa grupo sa manlalaban natukma usab sa usa ka kapsola nga napalgan sulod sa naimbargo nga sakyanan gikan sa HPG impounding area.

Ikatulo, si Atty. Archival mao ang milaban ug mipasaka og kaso batok sa mga opisyal sa Highway Patrol Group 7 tungod sa pagpangilkil niini og salapi sa iyang kliyente kinsang sakyanan nga gi-impound sa nahisgotang buhatan mao usab ang gigamit sa pagbanhig sa grupo sa manlalaban.

Pipila lang kini sa mga sirkumstansiya nga nagpalibot sa pagbanhig sa manlalaban ug mga kauban nga kun imong sumpay-sumpayon motudlo ngadto sa mga opisyal sa Highway Patrol Group 7 nga mao gayod ang mihimo sa krimin. Wala may tawo nga makasaksi nga sila gayod ang naghimo sa krimin apan dili sila makalikay sa tudlo sa mga sirkumstansiyal nga mga ebidensiya nga nagpalibot ug nag-alirong kanila.