EDITORYAL - Dili angay’ng lalisan ang sugat

Ang sugat sa pagkabanhaw ni Hesukristo nga ipahigayon kada tuig diha sa Minglanilla gihulagway nga maoy labing sikat sa tanan’g sugat dinhi sa Sugbo. Sa gabii pa lang sa adlaw’ng Sabado magsugod na paghugop ang daghang tawo nga mosaksi sa mabulokon nga pasundayag.

Ang paggamit og mga buhi nga anghel pinaagi sa mga bata nga magsul-ob og lubos puti nga sapot ug tauran nila og mora’g tinuod g’yud nga pako unya bitayon ibabaw sa magsugat nga imahen nila ni Birhen Maria ug sa nabanhaw nga Hesukristo, maoy makapadugang sa kanindot sa Sugat.

Kun imong sabton pag-ayo, ang pagpahigayon sa Sugat iya gayud kini sa kadagkoan sa simbahan. Apan gisakyan kini sa mga opisyal sa lungsod nga migahin og dako’ng kantidad nga salapi aron nga mapanindot pa pag-ayo ang pasundayag ug wala na kini himoa atubangan sa simbahan.

Gusto na karon sa kadagkoan sa simbahan nga ibalik ang pagpahigayon sa “Sugat Kabanhawan” nga anha himoa atubangan sa simbahan sa Immaculate Heart of Mary Shrine.

Pagka karon nga hapit na ang Domingo, dili tingali maayo nga lalisan pa kun asa ipahigayon ang Sugat.

Sa sunod tuig, angay’ng makigsabot daan ang kaparian sa Minglanilla aron ibalik na ang pagpahigayon sa Sugat atubangan sa simbahan. Angay g’yud hinoon nga wala’y disco nga ipahigayon sa dili pa ang Sugat aron paghatag og kasolemne sa kalihukan