Ang pagbalik ni Pacman

Sa edad nga 35 gipakita ni Pacman sa tibuok kalibotan nga anaa gihapon kaniya ang katakos sa pagka kampyon human niya pildiha pinaagi sa hukom sa tanang hurado   ang nakailog sa iyang  bakos nga si Desert Storm Timothy Bradley Jr. Sa unang higayon nakatilaw og pildi sa iyang karera sa boksing ang gitawag og Desert Storm.

Apan bisan sa kadaugan ni Pacman aduna gihapon siyay mga dumadapig nga wala makontento sa iyang kadaugan tungod sa rason nga wala mapatumba niini si Bradley. Sa kinatibok-ang hugna sa away sa duha ka boksingero nagpabiling nagbarog si Bradley. Bisan kun klaro sa iyang panagway nga gikapoy na siya apan iya gayod nga barogan ang iyang bakos sa pagka kampyon.

Si Bradley dili basta-basta nga boksingero. Sa tibook niyang karera sa boksing wala pa siya makatilaw og kapildihan busa dili siya dali nga matumba. Si Bradley mat-an pa sa pinya ug maro nga boksingero, makamao siya nga boksingero ug labaw sa tanan kusog usab ang iyang kumo. Sa laktod nga pagkasulti dili siya dali nga mapatumba.

Sa ato usab nga nakita nagmatngon na si Pacman sa iyang lihok ug klaro kaayo nga nakatilaw na siya og tagam sa iyang pagkapildi ni Marquez maong wala na siya magdali tungod kay nakahibawo siya nga labaw siya sa score board sa mga hurado.

Kitang mga nagtan-aw sayon ra gyod kaayo nga manaway sa mga boksingero pero og kita pay didto sa boksing ring ambot og makahimo ba ta sa ilang nahimo. Busa kitang mga dili boksingero dili na lang ta magpatuga-tuga kay wala ta sa ilang kalibotan. Sayon ra ang pagsulti pero lisod ang paghimo sa gihimo sa mga boksingero.