Ang tanan akong ihatag

Usa sa mga nindot nga kahigayonan nga gigasa kanako ning panahon sa Semana Santa mao nga ako gipasulat og tulo ka mga drama sa Radyo nga ipabati sa estasyon DYHP Cebu. Ang tutulo ka mga drama naglangkob ning mosunod:

SAN JUAN MARIA-Padre Kura

Escribano: Ang Kinabuhi ug Pagka-Martir ni San Lorenzo Ruiz de Manila

Obispo Teofilo: Sa Dios Ikaw Nahigugma (Sugilanon ni Obispo Teofilo Camomot)

Sa tulo ka mga sugilanon si San Lorenzo Ruiz de Manila ang literal nga nagkanayon nga kun dunay usa ka libo ka mga kinabuhi nga iyang nahuptan, ang tanan iyang ihatag ngadto sa Dios gumikan sa iyang dakong gugma ngadto kaniya. Wala siya mawili mismo sa iyang kaugalingong kinabuhi, dili lang gyud matalikdan ang iyang pagtuo.

Ning Domingo sa Pasyon sa atong Ginoo, agi’g sinugdanan sa atong pagpamalandong sa Semana Santa, angay natong hinumdoman nga ang mga panghitabo ug kasaulogan, nakasentro sa dakong gugma sa Dios alang natong mga masalaypon. Ang kasakitan nga nahiagoman ni Jesukristo, dili kapildihan, kondili kadaugan batok sa gahom sa kamatayon ug kaulipnan. Ning semana sa pamalandong atong hinuklogan kun sa unsang paagi nato gilansang ang Kristo diha sa atong pagkamapasagaron ug pagkamausikon. Kun karon panahon sa paghinulsol, kini usab panahon sa pagpasalamat. Ug paagi sa pagpasalamat sa kahigayonan nga gihatag sa Dios, mao ang pag-usab sa atong kaugalingon

Karong Huwebes Santo, paminawa ang mga drama sa DYHP-CEBU ug pamalandongi ang kaayo sa Dios nga nasinati diha sa kinabuhi sa mga santos. Magsugod kini alas otso sa buntag.