Aron motaas ang kinabuhi

Dili ba kitang tanan nangandoy man nga unta kita hatagan sa kahitas-an og taas nga kinabuhi? Oo, apan unsa may gitas-on sa kinabuhi nga gusto nato nga abuton aron kini kapahimuslan sumala sa atong gipangandoy nga kinabuhi. Ang kamatuoran niini, gihatagan baya kita og taas nga kinabuhi apan kita ra ang naghimo og hinungdan sa pagpamubo sa atong kinabuhi.

Mao ba? Ato kunong palapdan ang gipanghimong mga pagtuon.

Sumala sa gihatag nga kasayuran sa World Health Organization (WHO), sa gihimo nilang pagtuon, nadiskubrehan ang gitas-on sa kinabuhi, pinaagi sa makuting ebalwesyon o konklusyon diha sa mga pormada o kahimtang sa apapangi’g o ang pagturok sa atong mga ngipon. Nga ang atong edad moabot pa ngadto sa 120 nga abtik o himsog pa ang kondisyon sa panglawas. Apan unsa may mga hinungdan nga bata pa masakiton na.Usahay mao pay paghimugso patay na. Sagad gyud kanato halos aduna nay gipamati sa panglawas. Ngano ni? Kini tungod kay ang atong kalikopan puno na sa kahugaw. Sama sa polusyon sa hangin, ang makakanser nga silaw sa adlaw, pagkaong kontaminado sa makahilong kemikals, ingon man ang radyesyon anaa sa mga modernong kahimanan ug uban pa. Sa ato pa, imposible na nga maabot ang taas nga kinabuhi gumikan kay way kapuslanan kini, kun kita buhi pa apan inutil na.

Apan di kita mawad-an sa paglaom, tungod kay makaabot pa kita sa edad nga 85 nga himsog pa. Kini matud pa sa pagtuon sa The Journal of the American Medical Assn. Ang ilang gibasehan mao ang 6 ka komon nga sakit sa kalibutan nga nakaapektar sa atong kinabuhi. Nga malikayan kining mga sakita, simple ra, kinahanglan adunay himuong gawi o estilo aron motaas ang kinabuhi, sama sa:

(1) Kinahanglan nga husto o dili taas ang blood sugar.

(2) Ibalanse ang imong kolesterol lebel.

(3) Imintin ang normal nga blood presyor.

(4) Walay kaagi o bisyo sa pagtabako o pagsigarilyo.

(5) Adunay minahal nga kapikas o kauban sa kinabuhi.

(6) Naka-eskuwela o may edukasyon sud sa 12 ka tuig.

(7) Monitora ang hustong timbang. Nga dili sobra sa katambok o obis.