EDITORYAL - Ang Bayani sa kanato

Niadtong miaging adlaw nga Miyerkules gitimaan ang "Araw ng Kagitingan" paghinumdom sa mga sakripisyo nga gihimo sa atong mga bayani sa unang panahon ug sa bag-o.

Ang atong mga opisyal sa gobiyerno midalit og mga pungpong sa buwak sa mga nagkadaiyang monumento sa mga Bayani agi og paghatag og respeto ug pagpakita nga sila ug ang ilang mga nabuhat wa makalimti sa mga nagsunod nga henerasyon.

Apan nasayran sa paglibot sa Banat News nga pipila na lang gyud ka mga tawo ang tinud-anay nga nasayod sa kahulogan sa maong adlaw. Sa ato pa bugtong ang pipila na lang ka tawo sa gobiyerno maoy nakahinumdom kanila.

Sagad sa mga napangutana  way ideya kung unsay gipasabot niini ug kung kinsa maoy gipahinungdan niini , ang ila rang natiman-an puwa kini sa kalendaryo.

Samtang gitudloan ang atong kabataan sa mga eskuylahan kabahin sa mga bayanihong buhat sa atong mga katiguwangan, daghan ang wala maka-relate niini sa modernong panahon.

Wa masabti og maayo kung asa ba mosakay kining pagkabayanihon sa tawo, kanus-a o ba kaha kung moabot ba ang adlaw nga ilhon ang ilang mga nahimo.

Dili lang ang pagpas-an og riple ug rebolusyon aron makab-ot ang kausaban maoy kahulogan sa pagka-bayani.

Kini mao ang inadlaw-adlaw nga pagkinabuhi sa tawo sa normal niyang kalihokan basta ang  katuyoan mao ra gyud ang kaayohan sa iyang kaugalingon, pamilya, katilingban ug sa iyang nasud.

Nagpasabot kini nga bisan ang ordinaryong buhat sa usa ka ordinaryong tawo basta gibuhat kini nga may maayong kahulogan mahimo na kining isipong bayanihong buhat.

Angayang isipon ang kada usa maisip na nga usa na ka bayani alang sa ilang tagsatagsa ka pamilya basta di malambigit sa mga pagpabadlong sa katilingban.